Metsüremi 22 nungi Air India tayimtsü Tel Aviv tashi senzütsü

Mumbai, Metsüremi 19 (Agencies): National carrier, Air India-i taruba Yangtepnü (Thursday) nungi menden 256 aliba Boeing 787-800 tayimtsü New Delhi nungi Tel Aviv yimti tashi senzü tenzüktsü.
Israel Ato kilonser, Benjamin Netanyahu-i India nunger tayimtsü Saudi Arabia adena senzütsü atema Saudi Arabia-i temelaba agutsüogo, ta sangdongba sülen Metsüremi (March) 7, 2018 nü Air India-i Metsüremi 22, 2018 nungi tenzüka hopta shia asemben Tel Aviv yimti nungi tayimtsü senzütsü, ta sangdonga liasü.
Air India-i menden 256 aliba Boeing 787 Dreamliner aircraft tayimtsü senzüdaktsütsü, ta tanü parnoki metetdaktsü.
Air India tayimtsü jagi Israel atongtsü atema Oman, Saudi Arabia aser Jordan linüktem adena senzütsü, aser Tel Aviv yimti atongtsü atema ghonda tenet agitsü, aser ibaji ajanga India aser Israel na tsüngda lenmang tatsüba akumtsü.
Israel nunger tayimtsü E1 A1-i mapang agiba dang nungi New Delhi aser Tel Aviv tsüngda ghonda ana agi tajemba agitsü, ta Air India-i sangdong ka ajanga metetdaktsü.
Air India-i yaküm May ita nung iba service tenzüktsü sentong liasü saka linük kari parnok litsü adena senzütsü memelaba ajanga iba sentongji mataloki aruogo.
Arab aser Islamic linük aikati Israel magizüker, ibaji ajanga iba tenokdangba liasü.
Linük ana tsüngda tayimtsü senzütsü atema tenzükba sentongji Metsüremi 22, 2018 nikongdang 6:00 ako nung New Delhi nungi tayimtsü apusoa tenzüktsü aser aonung 9:45 ako meta Tel Aviv atongtsü. Ajisüaka Rongchii (April) 1 nungibo tayimtsüji nikongdang 6:50 ako nungiang New Delhi nungi apusotsü aser 9:45 ako nung Tel Aviv atongtsü, ta Air India-isa metetdaktsü.