KCR aser Mamata nati Federal front tentettsü atema ayonger

New Delhi, Metsüremi 19 (Agencies): 2019 küm Lok Sabha election agitsü lia tanü Telangana chief minister, K Chandrashekhar Rao aser West Bengal Chief Minister, Mamata Banerjee nati BJP aser Congress na nung madenba party temi “federal front” ka tentettsü atema ayongzükogo.
Kolkata nung osangbenertem den jembidang Rao-i, “2019 küm matongdang Front ka tentettsü ta nüburtemi bilemer. Ni ibaji jangjashitsüdi, iba front ji India nüburtem atema asütsü. Ibaji yimtenren party kar teloktep ka masütsü, saka ibaji nüburtem atema asütsü. Front ka nüngdaker,” ta metetdaktsü.
Tanü Kolkata nung regional party ana senden amenba sülen iba osang jungkai adoker.
Rao-i, federal front ji linük yimtenren tensa nung temelenshi adokdaktsünertem indang asütsü, ta ashi.
Iba Front nung tongtiji shiba asütsü? ta asüngdangba langzüdang TRS tongti leniri, “Ibaji collective leadership asütsü aser federal leadership asütsü,” ta ashi.
Ano külen Mamata Banerjee-ia, federal front junga tenzükogo, aser longjemer inyakba ajanga yimtenren force ka akumtsüsa lir, ta ashi.
Yashi nüngtugu lawyer, Ram Jethmalani-i, taruba Lok Sabha election nung Ato kilonser, Narendra Modi-i aniba sorkar atsüngdoktsü atema WB Chief Minister, Mamata leniba nung third Front ka tentettsüla, ta jembia liasü.
Pai, “Taruba general election nung Ato kilonser Modi-i aniba sorkar atsüngdoktsü atema ni Mamata Banerjee leniba nung third front ka tentetdaktsüner. Mamata Ato kilonser akumtsü tetemsü,” ta jembi.
Tanü Mamata-isa, “Onoki o lemtep tenzükogo aser tanga party tem dena jembi tenzükogo. Aikati onok yaritsü ta onoki imlar. Onoki iba front ya tashi itdaktsüner,” ta ashi.
TMC tongti, Mamata-isa, party ka kijai linük yimsü masütsüla, ta ashi.
Tawa Rao-i National jenjang nung third front ka tentettsü atema jembiba sülen Mamata-i phone ajanga Rao den jembia liasü.