IPFT puri Twipraland balaka khanga Delhi nung rally ka ayongzük

Agartala, Metsüremi 19 (Agencies): Tripura nung BJP den lokteper sorkar akümba telok Tripura Indigenous People’s Front of Tripura (IPFT) pur minister dena parnok noklang aikati Amungnü New Delhi nung parnoki Twipraland state balaka ka akangba nenshia rally ka ayongzüka kaogo. Iba sentong ya iba lokti tir aser tawa shimba Fisheries and Revenue minister N.C. Debbarma lenisüba kübok aka. Iba sentong nung Ampinagar nungi MLA Sindhu Charan Jamatia-ia dena liasü.
Osangbenertem den jembidang State BJP tatong tir Subal Bhowmick-i ashiba agi, “Iba ya IPFT pur onük tongtibangtiba lir aser BJP puri iba amala sentong ayongzüka akatsüba atema shinga menokdangtettsü, saka BJP pur tenokdakdak jangja jangja lir aser onoki Twipraland akhangba kodanga pumasemtsü.”
IPFT puri state balaka khanga rally ayongzüka akaba dak sendakba nung opposition party aikati tasüngdangba balala asüngdangogo aser iba den külemi BJP pur tamendak dak ashishiogo.
“State balaka akhangba magizükaka iba party pur ya sorkar kümtetba nung densemogo aser tang parnoki parnok takhangba nungi masetshi state balaka akhanger. Iba ya Tripura nung BJP pur atema temaitsü tamajung ka lir,” ta Indigenous Nationalist Party of Twipra (INPT) tatong tir Jagadish Debbarma-i ashi.
IPFT puri iba rally atema local tem ket nungi tashiyim agi sen saruba atema CPI(M) MP Jitendra Debbarma-i aitsüogo. Paisa ashiba agi, iba amala tensa ka nung state administration-i kecha minyaki repranga dang atar.
Iba amala rally ka nung MLA kati shilem agiba atema Congress party otongdar kati ashishiogo. Kasa mapang nung paisa ashiba agi, BJP aser IPFT naya longjemer inyakdar aser iba ken o dak sendakba nung party ana ya longjemer inyaktsüla saka BJP pur tamendakdak mejangjai kümogo.