Fodder ken o pezübuba nunga Lalu Prasad Yadav aitsüogo

Patna, Metsüremi 19 (Agencies): Tanü Ranchi nung special Central Bureau of Investigation (CBI) court-i sen crore aika indang shiruru chiyungtsü senotsü nung ochimashiba ken o pezübuba nung taoba mapang Bihar chief minister inyaksang, Lalu Prasad Yadav aitsüogo.
Yashi court-i iba obendang agutsütsü atema anogo ka atsülanga liasü, aser tanü iba obendang agutsü.
Special CBI court-i yakünüa iba obendang agutsütsü aliba atsülanga liasü.
Lalu Prasad dak alia taoba mapang Bihar chief minister Jagannath Mishra den taoba mapang IAS officers aser ketdangser kar dena nisung 29 iba ken o nung aitsü.
1995 küm Luchii (December) ita nungi 1996 küm Aenjeti (January) tsüngda Dumka treasury nungi ochimeshii sen crore 3.13 agizükba nung parnok nem tai tonglokja liasü.
Shiruru chiyungtsü atema senotsü nung ochimashiba ken o asem nung küm 13.5 tepoukdak ayutsü obendang agüja tang Lalu tepoukdak lir.
Yashi RJD tongti, Lalu Prasad temang mejungi Rajendra Institute of Medical Sciences (RIMS)-i anir oa yaridar.
Yakünü CBI court-i taoba mapang Bihar accountant-general`s office nung ketdangser asem anema ken o kaa liasü. Court-i taoba mapang Bihar Accountant General, P.K. Mukhopadhyay, taoba Deputyy Acnt. General B.N. Jha aser taoba Senior Director General of Accounts Office Pramod Kumar nunger jaoka liasü.