Longleng nung Intl. Womens’ Week sentong tembangogo

Dimapur, Metsüremi 19 (TYO): Longleng jila nung hopta ki tepiyong International Women’s Week monga aruba sülen tatemsüa Metsüremi 16, 2018 nü Auditorium GHSS, Longleng nung tembangogo, aser iba sentong nung district kübok school balala nungi kaketshirtem aser tetsür tentettem nungi tetsürtemi shilem agia aden, ta tanü ketdangsertem osang ka ajanga metetdaktsü.
Womens’ Week ya ‘Beti Bachao Beti Padhao’ omen nung ajemdaker among.
‘Beti Bachao Beti Padhao’ omen nung ajemdaker jembidang Principal, GHSS Longleng, B. Watisangla Aier-i, lokti nung temelenshi bener arutsütsü atema shisatsü tashi agutsüba nung tetsürtemi nüma tangtettsü akok, ta ashi.
Tetsürtem dak tashi tulu lir, ta shia lai kaketshirtem dang peii inyakba mapa ajak tajungtiba nung inyaktsü aser tarutsü jenjang tajungba akumtsü atema yangerteta inyaktsü ajungshia liasü.
Laisa, takok angutsüji temela masü, ajisüaka nendaka aser meranga inyakba ajanga ibaji ajangzüktettsü, ta ashi.
Watisangla-i, tamakok anguba aser taküm nung tetsükdaktsü balala liaka melung mejemi maneni tejakleni aoertemi taküm nung takok angutsü, ta ashi.
Kaketshirtem dang tesayurtem aser taintem akhümtsübuang, ta ajungshia lai, “Koba tashika züngteta jenjang tongtetaka, tazüokba makaibo asenok tejakleni moutettsü,” ta ashi.
Lokti pelaa agizükba o jembidang Deputy Commissioner, Longleng, John Tsulise Sangtam-i, institution balala nungi tekolakpurtemi yaritepa inyakba atema iba sentong takok nguogo, ta pelaba metetdaktsü.
School balalai sentong balala inyakba dak sendakba nung pai, hopta ka piyong sentong nung kaketshirtemi shilem tajung agiba ajanga pa ajungmesoogo, ta ashi.
“District nung tetsürtem nem tashi agutsütsü aser parnok ajungkettsütsü atema asenoki kechisa inyakar meyipa reprangshidi,” ta paisa ayongzük.
Sentong nungsa Longleng kübok High School balalai sobaliba shilem balala agia liasü, St. Joseph Secondary School kaketshirtemi ken ka aten aser Painting/Drawing/Essay tetoktepba osang metetdaktsüba sülen certificates den sempet lemja liasü.
Iba sentong ya Vice President, Phomla Hoichem, Manda Phom leniba nung agi, Women Secretary, PBCA, Angbhen Phom-i Tsüngrem teyari meshia sarasadem aser Head Mistress, Mt. Carmel School, Amenla T. Imsong-i tepela anküp o jembia liasü.