Linük naklu ken nung Northeast enoktsü akhanger

Guwahati, Metsüremi (March) 19 (Agencies): Linük naklu ken nung northeast benoktsüla ta Assam nungi Congress MP Ripun Bora-i takhangba agütsüba pusema Amungnü (Deobar) All Assam Students’ Union (Aasu)-ia mapang talangka nungi linük naklu ken yanglushitsü atema takhangba agüja arur ta metetdaktsü.
“Onoki linük naklu ken nung northeast enoksemtsü atema mapang talangka takhangba agüja arur. Onoki sorkar tsüngdang iba onük mebenok saka linük naklu ken nung northeast enoksemtsüla. Aasu-i ibaji inyakdaktsünür” ta Aasu tir Dipanka Nath-i osangbener dang ashi.
Rogonü (Hokolbar) Bora-i private member’s resolution ka benokba nung “sorkar dang National Anthem nung ‘Sindh’ melena ‘Northeast India’ enoktsü ayongzüker” ta shia liasü.
“Northeast ya India nung tongtipang shilem ka lir, saka linük naklu ken nung iba tesem tetshia mali. Linük naklu ken nung Sindh bo tetshia lir saka iba tesem ya India kübok masü saka Pakistan kübok lir aser ibaji India asoshi tsükchir linük ka lir” ta Bora-i ashi.
Bora-i iba ken o benokba sülen Haryana minister Anil Vij-ia linük naklu ken nung ‘adhinayak’ olung melentsü takhangba agütsü.
India ya democracy linük ka lir anungji ‘adhinayak’ olung ya melentsüla, ta Vij-i ashi. Paisa Bora-i benokba ken o pusema nungit.
Linük naklu ken nung northeast benoktsüba onük ya mezüng AGP MLA Zoii Nath Sarma-i 1986 küm assembly nung benoka liasü.