Nagaland Legislative Assembly Secretariat-i Speaker pela agizük

Dimapur, Metsüremi (March) 19 (TYO): 13 buba Nagaland Legislative Assembly nung Er. Vikho-o Yhoshü Speaker inyaktsü shimba atema Nagaland Legislative Assembly Secretariat-i pa nem tenüngsang agütsüba den pa Office nung pelashishia agizükba osang metetdaktsü.
Metsüremi (March) 19, 2018 nü Speaker, Er. Vikho-o Yhoshü nem tenüngsang agütsüba aser pelashishia agizükba sentong ka ayongzüka agi aser iba sentong nung Er. Vikho-o den pa kinungtsü na den pa meina arurtem aden.
Sentong nung mendenji Secretary Ms. Pangamla liasü aser State Chaplain Rev. Kuzierang Tho-i temoatsü meshia sarasadem.
Nagaland Legislative Assembly tenüng nung Commissioner & Secretary N. Benjamin Newmai-i o jembidang, ketdangsertem aser staff-i Speaker den yariteptsü ta nangzük aser Nagaland Assembly Secretariat Staff Association tir I. Khoneyi Chang-i pela agizükba o tatsüka jembi.
Speaker Er. Vikho-o-ia o jembidang, Tsüngremi pa nem iba akhümket menden nung amentsü maongka agütsüba atema pelaba ashi.
Paisa, Nagaland Legislative Assembly nung ketdangsertem aser staff tem dang külemi longjemer mapa inyaktsü aser nübortem asoshi inyaktsü tayongzükba agütsü.
Tang Nagaland Legislative Assembly Secretariat nung mapa teinyakdak purtem den pai takok ngua mapa inyaka otettsü tamang akar ta Speaker-isa shisem.