Kanga Junga Adokogo

– Sentisashi Aier, Kohima.

Tawa kü nem music audio CD ka agütsü. Tenüngji OSANG TAJUNG KEN: Teti Pa Chubatsü. Kidangi bener arur, ni lepshijen lepshia angajen angatangogo. Kanga junga adokba CD ka lir. Ibai asen Aor Osangtajung Ken kaket nungi atenba lir aser asenoki metetaba ken teimba. Kodangsa angadir; Tanela ajungmesor, anitaka tenteter (shitak metentetaka), jangraatemer, aser temulung tesunep angur.
Aonung sentep atema temeja ken ka bushia atentsü asoshia mapa tulu lir. Süra CD nung ken menügoker adoktsü atemajibo koda? Sermon yabo nisung kati nokdaker pai renemba ama jembir. Saka kenbo yamaji masü. Talisa teloki atenba ken nung, pei ola ajungba dang masü saka parts balala adoka atenba den, ola ajungaji medem-medema atokba aser ano kongki den jangyu medema atentsü nüngdaker. Anungji sermon denbo ken ka bushia medema atentsüji tasakba lir.
Ni pastor ka lir. Ni Tsüngrem o nungi onük balala jembir. Saka item onüktemji kaket küma yanglutsü merangra, joko iba mapajibo kotinemti lir. Kechiyong O jembidangbo “Billy Graham indang ni yamai angashi” ta ser otsü ka ashitsü akok (jangjaa memetetaka), saka kodang iba kesa otsüji kaket nung ajenloker adoktsü ta südir, Billi Graham otsüji shitak asü masü? Kong? Kodang? Koma? atalok aji tejangja metetettsü nüngdaker. Temeja ken ka atenbaji mapa tulu saka iba kenji CD nung menüngoker adoktsü bilemra mapati lir.
OSANG TAJUNG KEN: Teti Pa Chubatsü CD ya, tashikar tebur 9-i atenba kentem lir. Parnok ya Bayavu fellowship kübok alirtem. Lokti tulu nung ken tena senzürtem (professionals) masü saka mapang ajak nung Tanela ken atentsü tejangrartem lir. Kenji 12 lir saka iba dak alaka item ken 12 soundtrack ajungaji inokja lir, anungji CD nungji ken 24 inokba ama lir. Telok balalai item soundtrack amshia Tekülem nung ken tentettsü.
Parnok rongnung Mr. Imtisüngkum (9774241177), shibai item kentem record süa edit asü, pa dang iba CD kong koma argur ta ni asütangogo. Iba CD ya sen Rs. 150/- lir (parnok timtim agiba yaribo malangtep ta nibo bilemer- nibo angati nguadokerji kecha masü). CD-ji parnok kentenertem ket nung aser item tesem nung angutsü ta ashi: Kohima Bible House, Dimapur Bible Centre, New NBCC Building Church Rd. Mokokchung Lucky Cassettes Library, AM Rd.