Kohima, Metsüremi (March) 20 (TYO): DAO division kübok Khonsa Battalion, Changlang Battalion aser Lekhapani Battalion nungi sepaitemi Metsüremi (March) 20, 2018 anepdang Tirap aser Changlang district tem nung NSCN(K) anema mapa inyak.
Iba mapang NSCN(K) züngsem 2 den NSCN(K) atema Over Ground Worker ka apu, ta PRO (Defence) Col C Konwer-i sangdong ka nung metetdaktsü.
Tirap district kübok Chop yimtsüng nung telungpurtemi ozüng alema mapa inyakba aser tashiyim agi sen saruba osang tejangja angazükba sülen Khonsa Battalion-i telungpurtem aputsü atema mapa inyakdang Private Khajam Pansa apu.
Pa ya Smopho Pansa’er jabaso lir ta jangjaogo aser pa ket nungi pistol ka den injangtem apu. Pa dang asüngdangya asüdang pa NSCN(K) züngsem ta nangzükogo, ta PRO (Defence)-i ashi.
Ano, Changlang Battalion-i Tirap Colliery nung telungpurtemi mita aodang Myanmar nunger Sang Ung Hakum apu. Pa ya Samri Hakum’er jabaso aser Myanmar kübok Thangthang yimer ta jangjaogo, ta Col C Konwer-isa ashi.
Sang dang asüngdangya asüdang pa Aenjeti (January) 2018 nung India-i aru ta ashi aser iba sangdong agütsüba tashi nung police aser Security Force-i pa dang asüngdangya tesüdak liasü, ta paisa shisem.
Changlang district kübok Lalpahar tesem nung Over Ground Worker kati tashiyim agi sen sarur ta osang tejangja ka angazükba sülen Lekhapani Battalion nungi sepaitemi iba nisung mita aodang Nisto Sema ta ser nisung ka apu. Pa ya Lalpahar yimer lir aser pa ket nungi sen lakh 5 dak tema bena lia apu, ta PRO (Defence) sangdong nungsa shia lir.
Nisto Sema ya 2005 nunga NSCN(K) den yaritepba atema apuba otsü lir, ta parnokisa ashi.
You must be logged in to post a comment Login