BJP aser Congress madenba teloktep

Trinamool Congress (TMC) aser Telangana Rashtra Samithi (TRS) tsüngda third front ka tentettsü atema tebilemba lemsatepogo saka ibaji kanga tezüba mapabo masütsü aser tentettsüsa inyaktet nunga sangküm general election tembangba sülen ang akoktsü südi ta bilemer. Telangana Chief Minister K. Chandrashekar Rao (KCR)-i BJP aser Congress maliba ‘federal’ front ka tentettsü atema mezüng tebilemba metetdaktsüdang yongi party aikati iba teloktep nungji madentsü ama nisung aikati bilem. Ajisüaka, KCR-i tayongzükba agütsübaji West Bengal Chief Minister Mamata Banerjee-i junger ta agizüka liasü, kechiyong lai aniba Trinamool Congress-i Left aser Congress na den külen tsütsü aser külen BJP den rarar. Ajisüaka, tamendakdak tajung ka melii tenzükba mapa nungji nübortemi kanga jangrabangrabo manidaktsü südi ta tsürema bilemtsür. India yimtenren putiotsü nung non-Congress aser non-BJP sorkartem küma liasü aser ibaji 9 buba aser 11 buba Lok Sabha mapangtem kümtetba liasü. Ajisüaka, mapang anaprong nung Congress mesüra BJP-i sorkartem pusema nungita liasü. V.P. Singh-i aniba sorkarji BJP aser külen Chandra Shekhar-i aniba sorkarji Congress ajanga yaritepa kümtet. Tesüiba mapang United Front sorkar ana kümteta liasü saka anaprongji Congress-i yaria akümba liasü. Sorkar ka nung H.D. Deve Gowda aser tangaba nung I.K. Gujral nati Prime Minister inyak. Temalen shia aliba sorkar ajakji election matongdang tesentaktep yur kümtetba masü saka election tembangba sülen akümbatem dang liasü aser iba jagi tang-a ‘federal front’ ka tentettsü ta asüdang election tembanger ang iba teloktepji akümtsü akok ta bilemer. Tanü linük nung yimtenren tensa kanga melenshiogo aser iba jagi BJP o Congress nati tena kati ka sorkar tashi marudaktsütsü atema tanga telok tilatemi akümba teloktep pusemtsü asü masü’ar meshitettsü. KCR-i third front kümtettsü bilembaji election magidang teloktep yanglur tokteptsüba indang mesayur, kechiyong pai iba teloktep nung dendaktsünüba party tem tsüngda vote kati ka agi yariteptsü makok. Telok tilatem ajakji pei pei tesem nung pei pei tongpang nung noktaka aliba teloktem dang lir. Trinamool Congress aser Telangana Rashtra Samiti naprongi BJP aser Congress sempaba dak alaka iba telok ana tsüngda temesüktep kecha mali. Telangana nung TRS ya regional party dang ka lir aser parnoki tongti süa toktepbaji Congress telok den lir. BJP-ia parnok nem timtem bener arutsütsü ta TRS-i tsübua bilemer saka TRS ya Telangana adenerbo memetet. Ajisüaka, KCR-i third front ka tentettsü merangbaji kobi melii linük sabang nung mapa tenzüka aotsü, kechiyong 2019 küm Lok Sabha election den külemi Telangana aser Andhra Pradesh nung assembly election agitsü lir. Anungji, sangküm Lok Sabha election mapang national-level alliance ka nung dena lir ta meshitetra TRS-i parliamentary election nung timtem tulu ajurutsü aser iba jagi pai ‘federal’ front ka tentettsü atema meranger. Ajisüaka, KCR atema tebilemtsü ka lir aser ibaji Mamata-i teloktep nung Congress medendaktsütsü ta tenangzükba magi. Trinamool Congress atemabo Left aser BJP teloktem dak ang lendong tuluba keta lir ama züngshir aser national level nungbo Mamata-i Congress den yaritepa arur. Anungji, KCR-i ‘federal front’ ka tentettsü merangba mapaji zübazübabo inyaka moutettsü südi aser pai asalentong melenshia tanga party tilatem mesüzüktet nungang kümtettsü akok ta bilemer.