Shisadangtsü “Clean Election” 2018

~ T. Nukshi Yaden, Tuli.

Tawa agiba Nagaland Assembly Election ya “Clean Election” yimyim nung agi saka iba Clean Election ya mapa agi inyak asü meinyak asenok ajaki ajangshiogo. Iba yimyim takok angutsü asoshi asenok senso ajak melenshitsü aika liasü saka asenoki aji ta melitet. Clean Election yimyim ajak agi senso Candidate meshimtsü nung dang rangloker inyak ama angatetogo aser iba doktepba atalokogo. Sen bo taliang lemogo oda tesem kar nungbo vote ka atema sen Lakh junga tashi agi aliba osang angazüker, ano maneni prangpong aser bomb amshia yi talobosa jima rara atalokogo yim ka nungbo IEF (International Evangelistic Fellowship) President kidang nungi yi aika police-i apuba tenük agi nguogo.
Taoba Urban Local Bodies election agitsü atema ashishitepdangbo Article 371(A) Naga nunger asoshi kanga tongtipang aser iba article ya wazüka ayutsü kanga sashia jembiogo. Saka tan General Election nungbo iba Article toa tezü nemena doktsüogo, saka ano yakta iba Article ya pena arua jembitsü süti. Kechi aser iba Article ajanga asen sobaliba, yimden yimli wazüka ayutsü temeten agüja lir.
“Putu menden serves as the administrative body of Ao area as per tradition and customary practices”. Aji oda putu mendenji Ao lima nungbo tamatiba yimsüsüba menden ta ashiba ama inyaka aru nungji yimdak yimkong aser par lika nung election temi kecha lendong tsüdong madaloki aser senotsü rongsen tali meindoki election agitsü mechi nung Senso Candidate ta songteta taoba 2013 election tazüokba nung agia aruogo. Saka taküm 2018 election yabo clean election yimyim nung shingaia shinga nükdangtsü makok ta Indian temzüng tapu balala amshia putu menden anema court nung case agütsütepba amshitepogo. Anungji iba ama inyakyim ajanga nübur aser yemer o yemer na tsüngta mangatetep tali adoka rarapangsen jenti adalokogo, ano maneni item ken O case aika metempangi amshitepyunga aotsü. Yemer O yemer na doktepdang MLA mendena mata yemer ajak akoksaogo.
Mera taket putu menden anak aoyi küma mechisa-a indokogo, sak yemer tepelembabo matalok akoksaogo. Yimden yimsüsür aser senso kodanga menüngdaktsü ama kanga ayokayaja inyaktetogo. Saka mapang ka nungbo ozü yimsüsür aser senso to nüngdaker ta pilemteta lepa pushia arutsüsa, aji oda tanü ajung asa-a tanü akok asa-a iba lima nung asen kija agi litemtsü ama maliang tajungba, kechi aser yimden aser pei senso ten keptepba alirji kecha nunga azükaru masütsü. Lai nunga Rom 13 nung yamai shia lir, Nisung shai yemsüsür kubak liang kechiyong Tsüngrem ain alema tanga mali; Aser kechi pangdak lir aji Tsüngremi shimtetba. Anungji shibai iba pangdak anema nokdakdir, pai Tsüngremi shimtetba anema noktaker aser shiri aji anema noktaker, parnoki pei sasa obendangba angutsü. Kchiyung yemsüsürtem mapa tajung asoshi tetsübutsü maka, saka mapa tamajung asoshi tetsübutsü lir. Aser nai yemsüsür metsübui liner ama? Kechi tajung aji inyakang aser nai pa nungi Tenüngsang angutsü.
Ano maneni election mapang nung ya olulu aser teyazü agi shidak ama osang tapu balala pei party tajangzük angutsü pushia prokshiteper. Talisa Mass media, Watsapp amala ajunga tatishitsü agi ke arungnunga tangar party-i rongtsü ama, kari accident asü nunga ajia kar nem tongloktsür, pei sasa kari nungi tsüka tsükseta asü sürnung nisung kartenüng amshia parnoki tepset ama otsü pura pujia yanglur prokshir kibo kecha meraksa sür nugn ozüki parnoki amak ta mashi tenüng kar anema case agütsür. Pei sasa cari rongtoker tangari rongtsü ama keno adoktsür, tetsür temia pei tia aser lai inyakba masadangi la anema mapa tamajung inyak ama sangdonger. Iba ama tensa ka nung asenok lokti süli keja süli tejangja adalokbaji kechiar memeteti aitsütepba mesüra takangba agüja osang kakettem nung agütsüba ibala ajanga nübur melung kanga yirutsür. Anungji tensa tia angateta asenok alitsü kanga tekümdangtsü kümogo. Aji oda ano tarutsü nung iba ama election mongpu shia ajurutsü alinung asenok libaliro inyakyim nung belemdangtsü lir asü ta kü tangatetba yari lemsateper.