Lendong atalokdak tongtepratepba ajak nokdangtsü

Singapore, Metsüremi 21 (Agencies) : Tashiyim maparen atalokdak tongtepratepba ajak (electronic communications) nokdanga ayutsü asoshi ketdangsertem nem tashi agüja tanü Rasemnü Singapore parliament nung ozüng ka yangluogo.
Osangbenertem nem agütsüba temeden agientsü ta shia ibaji anema nokdaka tanü ozüngji lateta yuogo.
Kiralongrartemi amakba densema lendong tulu atalokba tesem ka nung shinga nema noksa mesüra video magidaktsütsü atema iba ozüng jagi police nem tashi agütsür.
“Iba tesem temeket nung aliba shinga nema noksa mesüra video magidaktsüi nokdangtsü atema police nem tashi agütsür.”
Sorkari ashiba agi, tashiyim lendong atalokdang iba tesem nungi yokba ‘live broadcasts’ ajanga tashiyim maparen inyakertem nem maongka agütsür.
Aji oda süaka, iba ozüng jagi ‘press freedom’ atema tebilemtsü taliang agütsütsü, ta iba ozüng tasenba anema nokdakertemi ashir.
Home affairs minister tanabuba, Josephine Teo-i tatartem dang ashiba agi, teshimtet tesem ka nung dang iba talenbaji alitsü saka security maparen tembangba sülenbo ibaji agientsü.