Kabul bomb lendong nung 26 pokset, 18 yiru

Kabul, Metsüremi 21 : Kabul, Afghanistan nung Metsüremi (March) 21, 2018 nü suicide bomb poklokja amakba tesem nung asür ka Afghan ketdangsertemi bener aoba mapang tangokba noksa nungb angur. Kabul University anasa suicide bomber kati pa-sasa temang nung inoka aliba bomb pokdaktsüba lendong nung nisung 26 asü aser 18 yiru, ta ketdangser osang ka ajanga ashi.

Kabul, Metsüremi 21 (Agencies) : Tanü Rasemnü Kabul yimti nung tekülem ki ka anasa nisung kati taküm bendanga agüja pa mangji bomb kümer amakba mapang tajemba agi nisung 26 pokset aser ter ti shi yirutsü, ta ketdangsertemi osang ka metetdaktsüogo.
Afghan yimtiba Kabul nung Persia nunger küm tasen tenzükba nüngtem nung Nawruz sodi amongba mapang ka nung tang iba tashiyim lendongji ataloker.
Deputy interior ministry otongdar, Nasrat Rahimi-i Reuters osang den jembidang ashiba agi, taoba mapang nunga kiralongrartemi amakba Kart-e-Sakhi shrine anasa nisungba jagi taküm bendanga agüja iba tashiyim maparenji inyak.
Taoba January ita nung nisung noklang ka shi tepsetba sülen yimti kümzüka ayutsü ta sorkari nangzüka tanükertem teimba yoka liaka tang atalokba maparen jagi ano Kabul yimti kümzüka mali ta asüba kuli sayur.
Tanü atalokba bomb lendong koba Kabul yimti nung Shi’ite nungertem anema inyakba rongnung tang tesüsaba ataloker asütsü, ibaji Kabul yimti nung university tongtibangtiba anasa nüburtem tekülemdak nungi meyipa aoba mapang atalok.
Nawruz mesüra Navroz ta ajaba benjung koba Persia nungeri akhi tejen putu mapang nungi metsü yokba mapang amunger, iba ya Afghanistan nunga kanga lungsoa amunger saka yimsü nung kanga metsünga reta amangba Muslim nungertem karibo ibaji Islam yimsü den meputep ta shia anema nokdaker.