Nagaland nung HIV aketer nisung 22,878 lir

Kohima, Metsüremi (March) 21 (TYO): Taküm Aenjeti (January) ita tashi Nagaland nung HIV (PLHIV) aser AIDS aketer nisung 22,878 liasü.
Nagaland nung HIV adult prevalence rate ji 0.76% lir aser ajak dang temaba jenjang nung aliba state Manipur nung 1.06% lir, ta NSACS Deputy Director (M&E and BSD), Dr Vezokholu Theyo-i ashi.
Tanü media nisungtem atema HIV aser AIDS indang sensitization & training program ka alidang lai iba osang metetdaktsü.
India nung PLHIV lakh 21.1 lir aser state 9- Andhra Pradesh, Maharashtra, Karnataka, Gujurat, Uttar Pradesh, Bihar, Tamil Nadu, West Bengal aser Rajasthan nung PLHIV 82% ajunger ta Dr Vezokholu-isa ashi.
Nagaland nung nütsüng yongsük lakh 20 shi ka lir aser Aenjeti (January) 1999 nungi taküm Aenjeti tashi nisung 10,16,700 indang azü tendangba nung 22,878 dak HIV AIDS aliba putet.
Nagaland nung HIV AIDS menatepba noklang nung 91% ji shi nung medemba ajanga lir aser ibaji arishi küm 25 nung 34 tsüngda alirtem dak teimba putet. Ano, arishi küm 14 teküpok tanurtem dak putetbaji 6%, küm 15-24 dak 15%, 35-49 dak 31% aser 50 ser tema dak 7% liasü, ta Dr Vezokholu-isa metetdaktsü.
HIV positive putetba nisungtem rongnungi parnok 16,713-i Anti Retroviral Therapy (ART) agitsü atema tenüng agütsü aser parnok 11,183-i ART agidar. ART teyari agirtem rongnung nisung 1504 süogo aser parnok 7294 maneni agidar. Ajisüaka, nisung 2385-i ART treatment anenogo, ta laisa ashi.
Rongchii (April) 2017 nung Aenjeti (January) 2018 tsüngda nisung 1497 dak HIV positive putet, ta laisa shisem.
Iba sentong nung Joint Director (IEC) NSACS, Metevino Sakhrie-i Nagaland nung media nisungtem dang department-i HIV aser AIDS indang osang prokshitsü aser noktangtsü atema mapa inyakba mapa nung yariteptsü atema ayongzük.
Deputy Director (IEC) NSACS, Thejangunuo Theunuo-ia PLHIV pur bendanga amshiba aser senzüka yutsüba tangatetba agientsü atema asenoki tesayubatem agütsütsüla ta ashi.