Dimapur, Metsüremi (March) 21 (TYO): Naga yimten ken o adokba sülen nungi Naga nungertem kanga dang timtema aruba ama Naga nungertemi yimjung nung linür. India sorkar aser FGN tsüngda 1964 cease fire mapang Naga nungertemi yimjung ajangshi saka ibaji mapang tatsüka dang lirbo agienadok ta Nagaland Tribes Council (NTC)-i ashi.
Tanü asenok küm 20 shi ka ceasefire nung liyonga arur saka tanü tensa nung asenoki chichiba yimjungji mangu lir, kechiyong Naga political group ajaki India sorkar den ceasefire maliba ajanga asenoki iba khuretji ajurur, ta Media Cell, NTC-i sangdong ka nung metetdaktsü.
Osangkaket kar nung NSCN(K)-i yimjung aginür aser Naga yimten timi latettsü mulunga lir ta osang sangdongbaji kanga dang tajung aser nübortemi aginüba lir, ta parnokisa ashi.
NTC-i iba tangatetba pelashishia agizüker aser India sorkar dang maneni NSCN(K) den cease fire ayutsü aser yimten olemtep tenzüktsü mepishir. Yamaji asü nung dang NNPGs ajak olemtepba sabang nung adentsü, ta NTC-isa shisem.
You must be logged in to post a comment Login