Hindu nunger anema social media nung campaign ka tenzüker

Metsüremi 22, 2018 (Agencies): Küm asem tashi nung India nungi Khristan yimsü aser tanga tamangba yimsü tsütsü kin tilatem samatsütsü aser India ya Hindu linük temeja kümdaktsütsü, ta Hindu nunger telok balalai sentong yangluba anema social media campaign ka tenzüktsü, ta alima ajunga nung Khristanpur yariba telok, Open Doors ajanga sangdong.
Hindu yimsü akhanga amangertemi arogo balala dak lendong agüja 2021 tashi nungbo India ajunga ya ‘Hindu Rashtra’ kümdaktsütsü merangba tensa ka nung iba osang ya sangdonger.
Tamil Nadu nung tawa lendong agüja aruba rongnung, Hindu nunger nisung 50-i Khristanpur tekülem ki pongu maka aser Khristanpur züka merenshi aser reshikangshi timba akümer, aser Hindu yimsü akhanga amangertemi Khristanpur ajunga India nungi meindoker India ya noklang nung noklang shilem Hindu linük akümtsü bangjem.
“Tiamakatsüka Khristanpur timtem aika ajurur, aiben sorkar ketdangsertemi parnok mekümzükteter,” ta Open Doors ajanga ashi.
Tatishitsü agi, Tamil Nadu nung arogo balala nung lendong agütsüdang, kong Hindu nungertemi tetsür aika süoshi shisatsür züka merenshi, item telok rongnung sorkari agütsüba police ketdangser densema liasü, shironki Hindu yimsü kümzüka ayutsü tenzükba telok, Hindu Munnani lir, iba nung züngsem liasü.
“Lendong ajururtem timtemba mapang nüburtemi teyari magütsüba ajanga reshikangshi taliba akümer. Shi temang nung züka merenshiba dak alaka parnok ya senzüka yutsür amai bilemer,” ta osang ajanga ashi.
Open Doors temi Facebook, Twitter, Instagram aser tanga social networking tesemtem nung Easter madongdang teimla ka agütsüner.
Iba campaign nung, alima nung aliba Khristanpur ajungai nenok den nokdaka lir, ta India nung tamanger nem angatetdaktsütsü asoshi aser parnok atema sarasademja alima nung lenirtemi parnok reshikangshiba anema nokdaktsü atema sentong balala inyaktsü, ta Open Doors-i ashi.