US pastor Andrew Brunson ken o jembitsü anogo latetogo

Metsüremi 22, 2018 (Agencies): Itangiterba aser kiralongra mapa dak sendakba nung aija alisang, US pastor Andrew Brunson ya obendangba bangdak nung Rongchii (April) 16 nü nokdaktsü aser pa aitsüra tepuokdak küm 35 tashi ayutsü.
Izmir yimti nung pastor Brunson ya pur ita 17 sülen ang Izmir 2nd Criminal Court ajanga pa den ken o jembitsü ya agizük, saka iba ya tapak 62 aliba document ya ozüng alema Turkey nung aliba media balala nung temai adokba sülen ang agizük.
Nisung ka aija züluba document ozüng alema temai adokba ajanga telung o kecha meyuteti akümer, ta Brunson indang lawyer, Ismail Cem Halavurt-i ashi.
Iba ken o jembitsü atema Halavurt-i temzüng ozüng aser bushisüngdangba osang asadanga bushitsü asoshi ita ka majung lir. Brunson-i ozüng alema inyak, ta tezüluba nung taitsüba agüja aliba kulitem ya tang tashi melapoki yua lir.
Brunson ya Turkey nung kangadang tejangja kiralongrar telok: Islamic cleric, Fethullah Gülen indang FETO network aser ozüng alema mapa balala inyaker Kurdistan Workers Party (KWP) temi Chiteni (July) 2016 nung Turkey sorkar atsüngtoktsü merangba nung shilem agi, ta aija lir.
Pastor aitsüba ya tuluba prosecutor temi asüngdangya asüba miima tenük kuli alirtemi kuli agütsüba nung ajemdaker lir. Brunson-i aiben FETO network nung ketdangser den ajurutep, ta kuli alir kati aija lir, saka pastor-ibo tenüng agüja aliba FETO lenir memetet aser majuru, ta ashir.
Taoba Aami (June) nung Association of Protestant Churches in Turkey indang odongtar, Soner Tufan-i Brunson aitsüba anema nokdak aser, “Temzüng nung aliba ama inyakdaktsüdi. Kuli lira agüjang aser tekeraba nung ken o jembiang. Obendangba ya dang asenok ajaki aginer,” ta ashi.
Taoba hopta Brunson aija züluba yimjak nung sangdongba mapang Tufan-i, “Ibai kuli alemyiba lir. Andrew ya FETO nung ketdangser ka aser pai iba linük samatsütsü merang, ta aitsüba ya iba kuli atema mezüngmeshi aser aibelen ka ama lir. Shibai iba amala nung amangtsü? Pai pa indang taküm nung tongtibang mapang ajunga linük nung alitsü meranga pai inyakba aser jembiba ajak nung Yisu indang jembi. Kodaser iba amala nisung ka Islamic telok nung züngsem mesüra ketdangser asütsü?” ta ashi.
“Andrew Brunson ya tai maketba nisung ka lir. Tezüluba agi aitsüba nung kuli shidak mali. Pa merenshitsü asoshi temzüng shidak mali. Ibai yimden yimsüsüba ren nung kangadang tashiyim agi pua ayiba lir. Iba ajanga Turkey nunger ketdangsertemi pa tali jenjang tuluba kümdaktsütsü mechi temerenshi tamajungtiba akhanger,” ta Tufan-i World Watch Monitor dang Metsüremi (March) 21 nü ashi.
Brunson ya pei sasa US nung tepuokdak aliba Turkish Muslim cleric, Fethullah Gülen den melenteptsü mulunga lir ta Turkey Tir, Recep Tayyip Erdogan-i taoba küm Rongjui (September) nung yimjak nung sangdonga liasü. Turkey sorkar atsüngtoktsü meranger tamakok aluba sentong ya Gülen-i yanglu, ta Turkey-i aitsür. Washington-i Gülen ya magütsü tashi temulung melemi tepuokdak yua aliba nisung kata United States nem magütsütsü, ta Erdogan-i Aenjeti (January) nung shia liasü.
“Asenoki iba ya jangjashidi. Ni aibelen meinyakba nung ni tepuokdak lir, ibai tanga kecha agia masü saka ni Khristan pastor ka asüba ajanga lir. Ni kü kinungtsü aser chirnur kanga menungrar. Saka ni ya shicakba amai bilemer: Yisu Khrista asoshi ni timtemba ya pela bilemer aser taoba mapang nunga yamaji aikati timtema aruogo. Alima tesem balala nung aliba nüburtemi küden külemi nokdaka ni atema sarasademtsüba asoshi kanga pelar,” ta Brunson-i tawa Izmir tepuokdak nungi zülua lir.