Clean Election manentsü !

Nagaland nung tang mapangba ya election temer election timi agitet asü magitet ta jembiba mapang ka lir. Talisa, taoba mapang agiba election-tem dang nungi taküm küm agiba election yasa tajungba aser temerüktiba agitsü asoshi merangdangbaji tulu liasü. Iba nükjidong nung taoba küm ana tashi arogoi anir lokti tentet balalai Clean Election nüngdakba indang jembia aruogo. Aji oda, Nagaland nung election agia aruba rongnung nübortemi alima aser Tsüngrem tsütsü bilema shitak inyaktsü meranga shilem agiba election-ji taoba ita February 27 nü agiba election to asütsü. Ibayongji, tesem kar nung tashiyim amshia raratepba aser azü tokshiba lendong atalokyongbo, tesem aika nung tesünep nung timi election agiogo. Ano, taküm 2018 election nung tajung kaji taoba election-tem nung vote magütsüteti aruba nisungtem aika pei mulungba nung vote enoktsütettsüsa maongka nguogo. Ano, tesem aika nung candidate-tem dang nungi kecha memeshii pei tangatetba nung Tsüngrem dang sarasadema vote enoktsürtema aika liasü. Itemji Nagaland nung Clean Election asütsü merangba takoktem asütsü. Ano külen, Clean Election asütsü merangba nung tamakoktem indang reprangdangra, takok dang nungibo tamakoktemang teimba züngdangtettsü. Clean election asütsü jembibet jembi aser nangzüktep saka nübortemi taküm election nungsa sen teimbayong pei vote ayokba otsü lir. Ano, nisung aikati kechisüdir süaka takok angutsü mechi injang bomb aser süng long amshia tashiyim mapa inyakogo. Ibayongji aikati Clean election agitsü merangba mapatem nung tamakok anguba indang jembir aser sensatsür. Atangji, kongsa election timi magitet aser shibaisa election nung ochishia shilem magitet, idakji aser item jagi Clean election nükjidong tamakok ngudaktsüogo. Ajisüaka, Clean Election agitsü nüngdak angateta merangdangba mapa ya 2018 election asoshi kija merangdangba mapa ka masü saka asen lima nung election agi tashi merangdangtsüba mapa ka lir. Anungji, election junga agitsü merangdangba mapa ya takok mangu tashi asen lima nung election junga agitsü asoshi merangpet merangtsüla. Alima asünungji, ozüng raksartemji alitsübasa saka ozüng raksartemjiang tia maka asütsü. Ibayongji, Apijemtsü Shin nung “nisung tamajungertemji tamajung anogo asoshi yanglu,” ta shia angutsü. Alima nung ashi-auer aser nisung tepsetertem asoshi ozüng tesashi yuja liaka ashi-auyaba aser nisung tepsetba manenerji ta ser ozüngji agientsüba masü saka ozüngjiang akangshitsüla. Iba kasaji, asen lima nung election timi agitsü jembiaka nübortem teimbakati mangarji Clean Election indang jembiba maparen ya anendi ta masü saka tesashiba jembitsüla. Clean election indang jembia jembia election nung sen teimba endokba aser tashiyim amshiba agi asenok tezü matangtsüla. Itemji imlaa maliba mapatem ataloker amai asenoki mebilemtsüla. Ajisüaka, kechikoda election nung nisungtemi tim mesüi shilem agir aser kechi koda election junga magitetba ajanga asen lima teküpbok tiai air, iba tensa tia denji toktepa asenoki asen lima nung akok tashi election timi agitsü merangtsü nüngdaker. Tajung inyaktsübo bilemer saka tamajung inyakertem teimbaji ta ser asenoki tamajung purtem sülenang anidakra, alima raksartemji tamajung purtemji masü asenok tajung inyaknertemji asütsü. Election mapang nisung aika bang nungi adoka angashibaji, ‘nibo takoklen dener’ ta jembir. Aji shitak. Nisung shibaibo tamakoklen dennütsü! Ajisüaka, election agi shia sen agi vote alia aser yoka ta asüba agi akokba mesüra tashiyim agi akokba len adenba ajanga pei taküm aser kibong jenjang tamajungba dang akümba purtem aika angutsü. Joko, tanübo lanurtem nem tarutsü putu tajung ka yanglua toktsütsü atema tamajung purtemi anir akoklen masü saka tangatettertemi anir asen lima yanglushitsü merangba telok nung adener akümtsüla. Iba tangatetba nung ano taruba election-sa tajungba merükteta agitsü asoshi asenok senso shia Clean election pusemer kaka akümtsü tangsa tenüngdakba kümogo.