Cambridge Analytica nem India-i anogo 7 züngzüktsür

New Delhi, Metsüremi 24 (Agencies): Election nung amokbanga atsüshitsü mechi India nunger profile tem amshi asü masüar osang tejangja agüjang, ta India-i United Kingdom nung aliba Cambridge Analytica nem totuyuba ka Rogonü agütsüogo.
Election nung teka amuoktsü mechi temelaba melie India nunger nisung million 50 dak tali indang Facebook profile agientsü, ta iba data-mining firm ya aitsür. United States aser Britain nung ketdangsertemi Facebook aser Cambridge Analytica ya bushisüngdang südagi.
Metsüremi (March) 31 tashi nung tasüngdangba trok nung telangzüba agüjang, ta Cambridge Analytica dang IT Ministry-i shiogo, aser item tasüngdangba tem ya, komaser company ajanga user data ya benden, kija shia nungi temelaba agi asü magi aser data ya koma amshi.
Cambridge Analytica nung shilem agirtem indang tenüngtem India-i meshi aser data agitsü asoshi amshiba yimyatem aser kibur nungi temelaba agi asü magi, item tasüngdangba nungi telangzüba meshir.
Congress aser Cambridge Analytica tsüngta tesendaktep aliba indang tasüngdangba kar BJP-i hopta tetenzüklen asüngdanga lir. Social media sabang, Facebook amshirtem indang data tim masüba yimya nung amshiba osang angashia IT Ministry ajanga sangdong ka nung, jurila indang inyaksangshi nung temelaba melie kongshira tatok magütsütsü, ta shia lir.
“Iba ama inyaksangshi asoshi sorkari süoki yia reprangdagi aser India lisopur ajak indang jurila temeden wazüka aser kümzüka ayutsü asoshi bendanga agütsür inyaktsü,” ta ministry ajanga shia lir.
Data auya amshiba ajaga election mapang shilem agitsü merangba metetra temerenshi tulu agütsütsü, ta Law & IT Minister Ravi Shankar Prasad-i Facebook dang tekümdangtsü shir anogo ishika dang lir iba totuyuba ya agütsür. Nüngdak dang süra Facebook CEO Mark Zuckerberg jaoka jembitsü, ta Prasad-i amokmerena lir.
Cambridge Analytica dang nungi telangzüba aginüa totuyuba agütsüba nung tasüngdangbatem ya… Parnoki India nunger indang data amshitsü asoshi teinyaktsü mapa agütsü asü. Item mapa inyakba nung shirnoki shilem agi, ta shia lir.
Ministry ajangasa, kodaser user data ya company keti aru aser item data amshitsü asoshi kibur nungi temelaba agir asü masü, ta asüngdanga lir. Data bendenba ya koma amshi aser iba data nung ajemdaker profiling kata yanglu meyanglu, ta company dang asüngdanga lir.
Aser item tasüngdangba ya Metsüremi (March) 31, 2018 tashi nung telangzüba agüjang, ta ministry ajanga shia lir.