Lalu küm 14 tepuokdak ayutsü

Dumka treasury ken o 

Ranchi, Metsüremi 24 (Agencies): Küptoknü (Saturday) Central Bureau of Investigation (CBI) ajanga Dumka treasury ken o pezübuba obendang agütsüba nung Rashtriya Janata Dal (RJD) tekolakba, Lalu Prasad Yadav ya küm 14 tepuokdak asyutsü aser sen lakh 60 senchi achitsü totuyuba agütsüogo. Iba ken o nung pa Tentonü (Monday) aija liasü. Taoba Bihar chief minister, Jagannath Mishra bo iba court ajanga temeden agütsü. CBI judge, Shiv Pal Singh-i nisung 18 aitsü aser 11 medentsü.
Iba ken o ya küm 20 tejaklen Dumka treasury nungi sen crore 3.13 agizükba indang lir. Iba obendang agütsüba sülen Yadav-ibo telangzüba kecha magütsü saka, iba obendang ya RJD-i High Court nung benoka jembitsü, ta party vice-president, Raghubar Prasad Singh-i ashi. 319 CrPC kübok Lalu’er lawyer temi petition ka benokba ajanga tamalen iba ken o jembitsü ya court-i atsülangja liasü.
Lalu aser taoba chief minister den iba Dumka treasury ken o nung nisung 29 densema liasü aser parnok rongnungi nisung 18 aitsü aser 11 nem temeden agütsü. Iba amala fodder scame ken o asem tashi nung Lalu ya aija lir. Chaibasa treasury nungi kuli tiazü yanglua sen crore 37 agizükba ken o nung Aenjeti (January) 24 nü Lalu aser Mishra ya küm pongu tepuokdak ayutsü obendang agüja liasü. Ibaji masüdang Deoghar treasury nungi Lalu-i kuli tiazü yanglur sen lakh 89.27 agizükba nung aija pa küm asem ser tesadang tepuokdak ayutsü aser senchi sen lakh 10 achitsü obendang agüja lir.