Chief Minister Rio-i NPF nem o meyiptsür

Kohima, Metsüremi (March) 24 (TYO): People’s Democratic Alliance (PDA) sorkar indang alizüng kecha mali aser taoba NPF-i aniba DAN sorkari inyakba mapatem dang inyaker ta Opposition MLA temi aitsüba atema Nagaland Chief Minister Neiphiu Rio-i o meyiptsü.
2003-2013 kümsük asem tashi atongtepa pa lenisüba kübok NPF sorkar tashi aru ta Rio-i Nagaland nung opposition NPF Party dang ashi.
“Taoba NPF sorkari tenzükba policy aser program ajakji kü lenisüba kübok yangluba liasü aser tang NDPP-i aniba PDA sorkari yangluba den mesüktepa asütsü” ta paisa shisem.
“Onok akangakanga lir aser onok tsüngda tamang makatepba kecha mali. Cabinet menden aser portfolio alemba maparenji PDA züngsemtem sasep nung lir anungji NPF-i shisabulua mebilemtsütsüla. Parnoki ayipmejangi shisabulua alitsü akok saka iba mapaji onok indang lir onok pelapela dang lir,” ta chief minister-isa ashi.
NPP aser JD(U) teloktem ya Centre nung NDA den aser North East Democratic Alliance den-a yaritepertem lir, anungji parnoki onok den adenbaji tim dang lir. Ano külen Independent MLA ka dang alibaia onok den adentsü mulung, ta paisa metetdaktsü.
“Parnoki onok tashi itshidaktsüogo aser onoki parnok pelashishia dang agizükogo,” ta Rio-isa shisem.
Governor-i jembiba onük aitsüba atema Rio-i, “Ozü sorkari tashi angu. Kü lenisüba kübok onoki 2003, 2008 aser 2013 nung toktep. Ni 2003 nungi 2014 tashi Chief Minister inyak, anungji Governor-i 2018 nung ozü sorkar akümba indang jembir asütsü akok,” ta opposition pur nem o meyiptsü.