Mapa tasak shimtetba

Israel nungertem Ijip lima nungibo pila saka ano parnok nem Tsüngremi agütsüba Kannan limabo metongtet ta senzüba mapang, kenü anogo Tsüngremi Mosa dang Israel nunger nem Pai agütsüba Kannan lima ladangtsü asoshi tebu kidong shia nungi tanishir kaka yoktsü ashi aser Kibubai melaba ama Mosai parnok kin ter ana nungi tanishir kaka Kannan lima ladangtsü yok ta Züngdangba tapu 13 nung shia angur. Item tanishir 12 rongnung Tsüngremi temulung lemtettsüsa Pa dak amangba tasü tait aser temulung tulu adenba tanishir nisung ana liasü. Tena tenüngji ka Yihuda kidong nungi shimtetba Kaleb aser ka Efraim kidong nungi shimtetba Hoshea, shiba tenüng Mosai Yihusua ta melentsü. Item Israel nunger tanishir ter anaji Kannan lima lenden aser tenem ajunga anogo lir nü ladanga senzür külen parnoki anguba osangji Mosa, Aron aser Israel nübortem dangi bener aru. Ajisüaka, parnok itdangitertem 12 rongnung nisung ter-i bener aruba osang agi Israel nungertem tasü peletdaktsü. Itdangiter ter jagi Mosa dang ashi, atangji, Kannan limaji mamatzü aser ninang mojitsü ayimba lima ka lir, ajisüaka yangji alirtemji asenok dang nungi tashi taitba, aso kanga tulu aser parnok yimtiji atsübanga lir, anungji asenoki item nisungtemji makoktsü. Ashiko, iba osangji angashir Mosa aser Aron na dena tasü mait kümadoker alitsüa akok, Ajisüaka, idangji Kaleb-i ashi, “asenoki kenyongi tudi aser aji agidi, kechiyong asenoki aji kokteta lir.” Israel nunger ajak tasü peleter Egypt limai meyiptsü lia Kaleb-i iba ama tasü tait o ashiba agi, Yihusua dena tasü itshir, tenapronglai pei tula süoshi shisaa endoker, Israel nungertem dang Kannan nung aliba aso tulu nisungtemji metsübutsüla, kechiyong iba lima nung alirtemji Tsüngremi parnok nem agütsüogo ta ayimoktsü. Iba mapang nung Israel nungertemi tena long agi onseta endoktsüba tensa tia ka nungi Tsüngrem sayatenya agi Kaleb aser Yihusua na dang masü saka Israel nunger ajak kümzükba asenoki Züngdangba tapu 14 nung tejangja angur. Iba anogo nung jagi tenzüker, Mosa leniba kübok Kaleb aser Yihusua nungertemi anir tasü aser tashi itshir Tsüngremi parnok nem agütsüba Kannan limaji maktettsü asoshi apuso. Aji oda, Mosa melen Yihusua leniba nung Kannan limaji maktetyonga aodang, joko Israel kidong shia nem Tsüngremi melaba ama alinük madak senmang amangtsü asoshi lemsaa agütsütsü tenzük. Israel kidong ter ana rongnung Manase kin tesadang ka nem aser Reuben aser Gad kin na nembo parnok senmangtsü ali lemzüktsür külen, kenü anogo tanüngba kin 9 ser tesadang atema ali alemtsü asoshi kin ajak senteper ain tokdangtsü lia, Gilgal nung Yihuda chirtem Yihusua anasai aru aser parnok rongnung tanishir Kalebi Yihusua dang, parnok nembo küm 45 jakdang parnok külemi Kannan lima ladangtsü asoshi Mosai yokdang parnok tsüng ajemokba li, kong aso tulu aser tashi tait nisungtem liasü aser koba yimtitem long agi atsüngbanga liasü, item tsükchir tesashi aliba tesem Hebron tenemjiang agüjang aser yangji aliba tsükchirtemji pai aridoktsü ta mepishia meshi, anungji Yihusuai Kaleb nem pai meshiba ama Israel nungertemi kanga tsübuba tsükchir alidak Hebron tenemji agütsü. Tsüngremi Yihusua ajanga Israel kin shia nem ali senmang lemtsüdang, parnok kin shiai tenemleni masü mesüra nisung tamajunger alidak masü saka tsükchir malidak lendenlen dang aginüa bilemer alitsü. Ajisüaka, Kalebibo tsükchir alidak tenemlenji dang meshi, kechiyong Pai Tsüngrem dak temulung alem. Tanü asenoki aiben mapa temelaba apia inyaker mesüra mapa meinyak, animebelem ser jangratema alitsüba tesem bushir. Ajisüaka, asenoki teti anisüngzüka alitsü asoshi dang Tsüngrem dang shira, asenoki Tsüngrem leniba tashi aser sayatenya taochiji majangshitsü aser mangutsü. Tsüngremi Israel nunger nem mamatsü aser ninang mojitsü ayimba Kannan lima agütsü saka iba lima nungji alitsü atema parnok jakdang tongpang aika liasü. Adianutem, Tsüngrem tashi aser taochi ya kanga tulu saka nai nü taküm nung timtem aser anibelem maginüra, nai Tsüngrem tashi asangsang nung memetettsü aser Pa sentsüwangshi nung pelaba tepelaji memetettsü.