Sen “Meimbaji” Temenen Tapu Ajak Tera lir (The Love of money is the root of all kinds of evil)

~  Tiatoshi Longkümer, Kohima

“Saka temulung achiba den temeshibaji atangji tajangzük tulu lir. Kechiyong asenoki iba limai kecha bener maru, aser yang nungi kecha bener motet. Saka chiyongtsü aser tabentsü süoshi lira, asenoki aji agi temulung chia lidi. Kechiyong asenoki iba limai kecha bener maru, aser yang nungi kecha bener motet. Saka shirnoki takar kümnür, parnok tatitang nung aser sang nung aser tamashi takoksa azüabungba nung tsüker, ibala nisungtem teraksa aser tesama nung araksetdaktsür. Kechiyong sen meimbaji tamajung tapu ajak tera lir; aser aji bushi nung nisung kar tamang nung mashileni anir oa, tejashi jenti agi pei temulungjang ateta tsüngogo.” 1 Timoti 6: 6- 10
Okila: Hopta ishika jakdang Nagaland nung 13th State Assembly election tembangogo aser government tasen ka arur mapa tenzükdagi. Taküm election nung menden 59 atema candidates 195-i political party balala 9 aser independent nungi toktepa liasü. NBCC aser ABAM ajanga ayongba clean election campaign ajanga 2018 February election nung temelenshi aika nübur rongnung bener arutsüogo. Iba asoshi Tsüngrem nem tenüngsang agütsür. Saka ano yimya sübaba tejen mapa ka ano tali tamajungba benshibaji sen meshiba aser alemba ya liasü.
February 15 nü PWD junction nung colony panchayat-i ayonga common platform ka Kohima town constituency nungi tokteper candidate ana jaokba anogo nung nia sarasademtsü aja. Meeting tenzüktsü atadang candidate kati kü dang yamai ashi, “Brother, tang tashi nung onok candidate anati endokba ya danga bendendang nung Kohima town lenmang yabo black topping yanglura anüngtsüsa endokogo” ta shia liasü. Saka iba anogoji ano election anogo atongtsü anogo 12 lia ashiba lir. Iba sülen polling day tashi nung sen kwiki endoker alitsü?
Ano kenü ni school kima ozü tanur senshitsü atadang, party ka nung agent tajung ka ajuru. Pai kü dang ashi “Kohima town constituency nung voter-temi sen kanga meshir. Vote ka nung Rs.3,000 agir. Aser Aor kibong aikati sen agir…”
Takümbo kima nung masü saka kibok nung dang sen agizüker. Kibong 5-10 longjemer, parnok leader ka arur aser pai/lai kibongtemji sayur. Saka ano sen magitsü ta ashira aika lir” ta shia liasü.
Mokokchung town constituency nungi tenzüker Mokokchung district nung constituency 10 nung sen amshitepba osang yabo tetsübutsü ka asenok ajaki angashiogo (aser karibo tenük khuli tejangja alitsü). Ao lima nungbo vote ka or kibong ka voters lakh junga agi alitepba angazükogo. Election nung sen amshitepba ya tetamatsüka aser tebilemtsü tulu lir. Item otsü osang ya angazükdang kü mulung nung item tasüngdangba ya arur:
Q. Kechiba asen Naga nunger/ Aor-i cash money ya yamai meimer?
Q. Kechiba clean election nung vote mayoktsü yamai jembiakasa nübur teimbai sen dang ano “ma” ta meshiteter?
Q. Kechiba asenoki election candidate-tem “sen makara koda pa election aitsü ta jembir”?
Q. “Pa/la minister or Govt. nung tulur alidang bendenba sen achir dangji kecha maliar ta” ashiba ya shitak-asü masü? Süra kechiba, social worker-tem sen makai election-i aidanga vote atema sen meshir aser sen makara parnoki election nung makoker?
Asen Naga nungeri sen meimba ya kheni tangatettsü tasak aser ya junga study asütsü nüngdaker.
Laishiba aser Sen:
Laishiba nung sen or rongsen tim lenmang ajanga /ochishia bendenba ajanga akaba atema kecha aijaa mali (no condemnation for becoming rich through proper means.). Tsüngremi Pa sülen anidaker aika rongsen jenti moatsüba asenoki laishiba otsütem nung angur. Eg. Abraham, Isaac, Jacob, Yosef, Job, Foibe, Amrethia nunger Yosef, Kornelia etc.
T. Ken 112: 1-3, “Kibuba tsüngken tsübuba nisung tepelatsü, Shibai pa temelaba nung tepela tulu angur. Pa metsü alima nung tashi tulu alitsü. Tindang putu moatsütsü.
Azükaru aser rongsen pa kidang alitsü; aser pa temeshiba teti tatem maka alir.”
Dawid chubai ashi, rongsen aser konang ajak Kibuba nungi dang arur, ta 1 Putipuyang 29: 12 nung shia angur:
“Rongsen aser tetushi na nungi arur, aser nai ajak madak yimsü asür. Ne ket nung ain aser tashi lir; aser tulu kümdaktsütsü aser ajak nem tashi agütsütsü ne ket nung lir.”
Süra, kechiba asenok tamangertem asoshi “sen” yagi yamai tebelemtsü adokdaktsür?