Mangkolemba nung MALT-i leper leni aoba lenmang yanglu

Mangkolemba, Metsüremi 26 (TYO): Metsüremi 24, 2018 nü Mangkolemba Ao Lanur Telongjem (MALT)-i Mangkolemba nung leper leni aoba lenmang yanglushiogo; iba lenmang ya mapang talangka sendoka yutsüba lenmang ka liasü, ta MALT Tir, I. Tia Jamir aser tongti tezülur, Sentimeren Imchen nati sangdong ka ajanga metetdaktsü.
Iba lenmang ya Mangkolemba-Longnak road nungi metre 400 shi lir, aser tzüngluruwa tenzükba ajanga gari mesenzütettsüsa kümer liasü.
MALT bangzüng nung, küm shia lokti nübodok mapa khen inyaktsü lemteta lir, aser iba nungji ajemdaker MALT züngsem 150 shii kilentzü aodak atuba den külemi gari lenmang nung longsang lema liasü; parnokisa leper temeket merüktetogo.
Iba mapa inyakdang senotsü densema teyari balala nguogo, aser iba atemaji MALT-i nija aser telok balala, talisa Mangkolemba Baptist Arogo-i sen 10,000, Mangkolemba Town Council (Care Taker)-i sen 10,000/- tenla den külemi nübo tenlaba, aser PWD (R&B)-i anogo ka atema JCB tenlaba atema pelar, ta kasa sangdong ajanga metetdaktsü.