NIIT Dimapur Center-i teyariteper ajak dang pelar

Dimapur, Metsüremi 26 (TYO): Metsüremi 27, 2018 nü NIIT Dimapur Center indang 19buba Foundation Day nüngtem nung Team Royal Tigers-i Center ainba nung shilem agia yarir aser temeimer ajak dang pelar, ta NIIT Dimapur Center tekolak, Daniel Changkiri-i sangdong ka ajanga metetdaktsü.
Dimapur nung aliba NIIT’s computer training nung nisung 25,000 shi training agiogo, iba dak alia tesüiba küm 18 tsüngda fresher 100 dak tema iba Center nung mapa nguogo.
NIIT nung training agir 300 shi mapa tajung nguogo aser aikati computer training agiba ajanga pei mapa nung teyari nguogo.
NIIT Dimapur-i Nagaland nung mapa manguba tebilemtsü samatsütsü nükjidong nung kaketshirtem nem Digital Transformation, GNIIT, Diplomas in Finance & Banking, Hardware & Networking, Executive MBA programs, Basics of Computers, Programming Languages, Open Source technologies aser Skill Development programs ajanga technology tasentiba indang shisatsü agutsür, ta paisa metetdaktsü.
Iba dak alia Center-i school 11 aser college trok den longjemer inyakba ajanga kaketshir aikati fee tera dang agüja computer angzüktsü maongka angur, iba den külemi merit kaketshirtem aser maongka junga manguba kaketshirtem onok indang offers aser scholarships ajanga ajangzükogo, ta paisa metetdaktsü.
Metsüremi 29 aser 30 nü Mahavir Jayanti aser Good Friday anogomong aser Metsüremi 31 nü Hanuman Jayanti anogomong ajanga class magitsü aser Metsüremi 31 nü class tenzüktsü; Team-i Jains, Khristians aser Hindu nungertem dang tasoba anogomong balala aser Easter salem abener, ta sangdong nungsa shia alir.