Küm 28 sülen Mizoram telungpurtemi sorkar den yimjung yanglutsü

Aizawl, Metsüremi (March) 26 (TYO): Küm 28 tashi rarayonga aruba sülen Manipur nung amenoka aliba Hmar People’s Convention (Democratic)-i taruba ita Mizoram sorkar den tenangzüktep ka agitsü, ta home department ketdangser kati ashi.
“Metsüremi (March) 7 aser 8 anogotem political-level olemtep mezüng agidang tenangzüktep ka agitsü atema lemtetogo” ta ketdangserisa ashi.
Taoba Sangtennü (Mongulbar) Home minister Lalzirliana-i assembly nung Rongchii (April) ita Hmar ken o angatetteptsü atema tenangzüktep ka agitsü ta metetdakja liasü.
Iba tenangzüktep agiba sülen Hmar telungpurtemi prangpong-injang toktsütsü aser iba sülen sorkari Sinlung Hills Council ta tentettsü bilema aliba asoshi tashi agütsütsü aser inyaksangshia aotsü atema sentong renemtsü.
Sinlung Hills Council ya tang Sinlung Hills Development Council (SHDC) kübok aliba litsü nung tentettsü.
Lalhmingthanga Sanate-i aniba telok denbo tangatettep kati marutet. Assam nung amenoka aliba Hmar teloki autonomous council balaka tentettsü aser Centre dena olemtep alitsü atema takhangba agütsü saka ibaji Mizoram sorkari magizük.
Mizoram kübok Manipur nung arrtsüa aliba tesem nung autonomous council balaka tentettsü indang takhangba ya 1980s mapang mezüng agüja liasü. Mizoram Hmar Association ji political party ka aküm aser 1986 nungi Hmar People’s Convention (HPC)-i iba takhangba atema inyaka arur.
Mizo Peace Accord ajanga parnoki akhangba atema telangzüba kecha magütsü aser iba nungji Assam aser Manipur nung aliba tesemtem dena Greater Mizoram ka tentettsüba dena lir, ta HPC-i ashir.
1992 küm HPC-i state sorkar den yimjung olemtep tenzük aser iba ajanga SHDC tentet aser 1994 küm Hmar telungpurtem temai adok.
Ajisüaka, iba nung temulung masüba agi Sanate-i 1995 küm HPC toktsür HPC (D) tenteta liasü.
Parnoki Sixth Schedule kübok Hmar nunger asoshi autonomous district council balaka tentettsüla ta takhangba agütsü.
Sanate-i Kuki nunger telungpur teloktem den Manipur sorkar den suspension of operation agiba ajanga pa Zosangbera-i aniba teloki Tir menden nungi atsüngdok.
Tawa tu pa Assam Police-i apu aser tang pa tepuokdak yua lir. Zosangbera-i aniba telok nung finance secretary Norbar Sanate tepsetba atema tai tonglokja pa apu.