Rio aser Zeliang nati Deputy Speaker Zhaleo nem tenüngsang agütsü

Dimapur, Metsüremi (March) 26 (TYO): 13 buba Legislative Assembly nung Deputy Speaker inyaktsü atema tetokteper shinga melii Zhaleo Rio shimogo.
Metsüremi (March) 26, 2018 nü Forest Environment & Climate change Minister, Parliamentary Affairs C.M. Chang-i pa tenüng benok aser School Education Advisor, K.T. Sukhalu-i pusema nungit.
Chief Minister & Minister in charge of Finance, Neiphiu Rio-i Deputy Speaker nem tenüngsang agüja jembidang iba menden indang teinyaktsüji assembly tiptema anitsüba lir. Speaker malidang Deputy Speaker-i Speaker indang khuret agizüka inyaksangshitsüla, ta ashi.
Zhaleo-i aika dang ajangshia aruogo aser pa NCS ketdangser ka ama inyakba den ano 1997 küm IAS ketdangser jenjang nung ajungket. Pai tensa tamajung ka nung tangar memenepba tesemtem nung inyak aser sorkar department asoshi tajungtiba agütsüogo. 2013 küm pai yimten yimsüsüba nung shilem agitsü atema voluntary retirement agi aser pa ama aika ajangshia aruba nisung kati assembly tiptema anitettsü, ta Neiphiu Rio-isa metetdaktsü.
Zhaleo Rio-i public tenzükba mapa nung shilem tajung agia arur aser pai IAS association nung general secretary aser NCS nunga Vice President ama inyakogo. Pa ya saisapong meimer ka lir aser iba jagi 2001 nungi tang tashi Basketball Association tir ka ama inyaka arur aser tanga teloktem nunga sendaktepa lir, ta paisa shisem.
Chief minister Rio-isa party balala nungi MLA ajaki Deputy Speaker tasen den yariteptsü ayongzük aser züngsem ajaki assembly tiptema agia odaktsütsü imlar, ta shisem.
Deputy Speaker nem tenüngsang agüja jembidang Opposition lennir T.R Zeliang-i “Zhaleo ya mapang talangka ketdangser ka inyakba nisung lir aser kümsük tanabuba atema MLA ka lir, anungji pa ama ka Deputy Speaker inyakba asoshi akhümtsübur. Iba jagi Opposition-i Deputy Speaker election nung metokteptsü telemtetba agi aser pa inyaktsü shimdaktsü” ta metetdaktsü.
Nagaland Legislative Assembly nung tiptema dang inyaksangshia arua lir aser tenüng tajung lir. Anungji Opposition züngsemtem bendanga mamshitsü ta Opposition Bench-i imlar. Zhaleo-i party telemsa kecha melii dang mapa inyaktsü imlar aser Opposition party nungi MLA temi assembly tiptema agitsü atema yariteptsü, ta TR Zeliang-isa ashi.
Deputy Speaker ka inyaktsü atema pa den tetokteper shinga melii takok ngudaktsüba atema züngsem ajak dang kanga pelar ta Zhaleo Rio-i iba menden nung mener mezüngbuba jembidang ashi.
Tanü pa nem lemzüktsübaji akhümket menden ka lir aser assembly nung züngsem ajaki meyaritepra takok ngua meinyaktettsü, ta paisa ashi.
Zhaleo-isa assembly nung züngsem ajak dang pa den yariteptsü atema mepishi.