Congress-i Cambridge Analytica shim: Osang sangdonger UK Parliament-i jaoker

New Delhi, Metsüremi 27 (Agencies): Vote agütsürtem atema ochimashi maparen inyakba ken o ka nung Indian National Congress-i Cambridge Analytica (CA) data consultancy firm amshi, ta UK nung Parliamentary Committee dang ashi. Ibai Congress telok asoshi maksü tulu ka lir, kechiaser parnoki iba firm den tesendaktep kecha mali, ta shia lir. Cambridge Analytica aser Facebook ya temelaba melie social media amshir indang website indang personal data amshi, ta aitsüba ajanga alima ajungai meteta lir. Congress tir Rahul Gandhi indang election nübuyimba mapang Congress-i Cambridge Analytica den külemi ozüng alema mapa inyak, ta Bharatiya Janata Party (BJP)-i aija lir.
Iba osang temai adoktaktsür aser taoba mapang Cambridge Analytica nung mapa inyaker, Christopher Wylie ya UK nung Parliamentary Committee dangi jaoka jembi aser iba mapang CA ajanga India nung mapa inyak aser yangji office lir, ta pai nangzük.
“Parnok indang client ya Congress liasü ta ni amanger saka parnoki project ajak inyak ta ni meteta lir. National project inyakbabo ni mebilemteter saka regional jenjang nung inyakbabo ni meteta lir. India ya kanga tulu lir aser yangji state ka ya Britain ama tulu lir. Saka yangji office aser staff lir,” ta Wylie-i House of Commons nung digital, culture, media aser sports committee dang ashi.
Pai-sa CA-i India nung mapa inyakba indang kuli lir ta ashi.
Anogo ishika süyiogo, Cambridge Analytica den ideology balala aser iba ama maparen inyaktsü asoshi senotsü teperi mali, anungji Congress-i iba mangatetep adoktaktsüba maparen nung shilem agia mali, ta Congress odongtar, Divya Spandana-i osangbener dang shia lir.
Osang ajangasa ashiba agi, Cambridge Analytica-i Facebook nungi agitetba data amshia 2016 küm US Tir Donald Trump election nübuyimba mapang voter research agia liasü. Iba ken o ya UK nung ketdangsertemi bushisüngdangba mapang lir.