Arunachal Angh-i youth employment mission amenok

Itanagar, Metsüremi 27 (Agencies): Bhutan, China aser Myanmar arrtsü kümzüka ayutsüba atema Arunachal nungi lanur 2000 shimtsüba atema Arunachal Angh B D Mishra-i mission ka amenokogo.
Brigadier (Retired) Mishra-i ashiba agi, lisopur sepaitem ama lanurtem shimtsü asoshi inyakdar.
Mishra-isa ashiba agi, army temi Sikkim anasa Docklam nung taoba küm Chiteni (July) PLA sepaitemi lenmang yanglua aliba nokdangogo aser iba ajanga China nunger nem osang tejangja ka agütsüogo.
Maneni Arunachal nungi lanurtem security dak sendakba nung drill tem nung shilem agiba ya army atema tajangzük asütsü aser tsürapur o ketdangsertem dang iba mission takok asoshi nungita yaritsü asoshi, Brigadier (Retired) Mishra-i mepishiogo.
Tsüngsang mongpu takzütsü makokba aser tenem longren agi sünga aliba ajanga Arunachal Pradesh nung arrtsü anüker sepaitem kanga tim atemer, ajisüaka Arunachal nung aliba lanurtemi item ajak ya junga meteta lir asünung parnok atema kanga timtembo masütsü, ta paisa ashi.
Paisa ashiba agi, army recruitment rally tem ya Jairampur nung Monupii 10 nungi 13 tsüngda akatsü asoshi renema lir. Iba rally dak sendakba nung takok angutsü atema Rongchii (April) 9 nungi Monupii (May) 10 tashi coaching agitsüba atema Army Education Corps nung non-commissioned officers (NCOs) asem shimogo.
Coaching ya Bomdila (East Kameng aser Tawang districts atema), Seppa (East Kameng), Daporijo (Upper Subansiri aser Kamle), Itanagar (Papum Pare, Kurung Kumey, Kra Daadi, Lower Subansiri), Likabali (East aser West Siang), Pasighat (East, West aser Upper Siang), Roing (Lower aser Dibang Valley), Tezu (Lohit aser Anjaw), Namsai (Namsai aser Changlang) aser Longding (Longding aser Tirap) nung agitsü aser temulungertem online ajanga züngoksemtsüba atema NCO ana shimogo, ta paisa ashi.