Delhi nung Sharad Pawar aser Mamata Banerjee ajurutep

New Delhi, Metsüremi 27 (Agencies): Nationalist Congress Party nung tekolakba, Sharad Pawar aser West Bengal Chief Minister aser Trinamool Congress lenir, Mamata Banerjee na linük yimtiba nung Sangtennü ajurutep. Chiyongba sentong nung Mamata Banerjee ya majurutsü aser senden mamentsü ta Pawar-i shir mapang tatsüka dang lir tena ajurutep.
West Bengal Chief Minister den chiyinga senden amentsü asü, ta osangbenertemi asüngdangba mapang, “Sendena mali, chiyongba sentonga mali,” ta Pawar-i langzüa liasü. Trinamool telok nungi lenir ya Delhi Chief Minister aser Aam Aadmi Party lenir, Arvind Kejriwal densema opposition lenirtem ajurutsü asoshi Delhi nung arua lir. Parliament telung aser tema nung Narendra Modi sorkar den tokteptsü asoshi jembishinütsü nükjidong nung iba senden ya amen. Mamata Banerjee ya Tentonü aonung linük yimtiba tonga aru. Lai taoba Congress tir aser tang UPA mendenpula, Sonia Gandhi Rasemnü ajurutsü.
Trinamool lenir ya Parliament House nung lar tejen tembartem, Nationalist Congress Party, Shiv Sena, Rashtriya Janata Dal nungi lenirtem aser MP tem den ajuruogo.
Pawar den senden amenba mapang, Banerjee-i tang yimten tensa indang jembi. Pawar-i taküm Aenjeti (January) nunga opposition party senden ka jatepa liasü.
Mamata-i Sonia Gandhi ya lar kidang ajurutsü aser ibai jurila atema lir, kechiaser West Bengal leniri Sonia Gandhi temang asoshi kanga bilemtsür, ta osang ka ajanga ashi.
2019 Lok Sabha election nung opposition party tem ya BJP-i aniba National Democratic Alliance den tokteptsü asoshi candidate külemi shimtsü südi, ta osang kar ajanga ashir. Parnoki BJP aser Congress nungi bila third front party tezüktsü merangba osang angashia lir.
Taruba Lok Sabha election matongdang BJP masüba political party tem lungjemtsü asoshi inyaktepba nung Mamata Banerjee-i tongti shilem agir. Telangana Rashtra Samithi (TRS) lenir aser Telangana Chief Minister, K Chandrasekhar Rao-ia Banerjee den ita tetenzüklen ajuruogo.
“Kodang yimten yimsüsürtem ajurutepdir, yimtenren otsü jembitsü. Yangji miimshitsü kecha mali. 2019 Lok Sabha election ya jangratemtsüka asütsü,” ta Mamata-i tanga political party lenirtem ajuruba sülen ashi.
Tentonü Mamata-i Parliament semdangba mapang Shiv Sena MP Sanjay Raut, TRS MP K Kavitha (Telangana Chief Minister Kalvakuntla Chandrashekhar Rao’er jala) nungertem ajuru.
“Asüng ni BJP lenir Yashwant Sinha, Arun Shourie aser tangartem ajurutsü,” ta West Bengal Chief Minister-i ashi.
Taoba mapang NDA sorkar nung densema aliba Telugu Desam Party (TDP) densema party kari Parliament nung Narendra Modi-i aniba sorkar anema ‘no-confidence motion’ benoktsü merangba mapang ka nung Mamata-i opposition lenirtem ajurur.