AKM-i ayongba angati coaching class tenzükogo

Mokokchung, September 01 : Küm shia Ao Kaketshir Mungdang (AKM)-i class 10 (repeaters) shisaluyimertem nem angati coaching class agüja aruba ama September 1, 2015 anogo AKM Conference Hall nung tongti tesemdanger Shri. Rajesh IAS (ADC Mokokchung) süa 2015-16 coaching class sentong tenzüktsüogo.
Taoba class 10 tatidang nung tamakok ngur alir shisaluyimertem nem AKM-i taa kecha magidang 2007 küm nungi angati coaching class sentong ya ayongzüka agüja arur aser taküm agi küm tokububa asütsü. Taküm iba coaching class nung adentsüpur shisaluyimer 30-shi lir aser December tashi tangazükba agitsü.
Sentong nung tongti tesemdanger ka ama jembidang Rajesh IAS-i, “Tarutsü nung na kechi kümner ibaji tang telemtetba agia shimtetang aser tenzüka inyakang, süra alizüng tongteta asemtettsü. Nisung shia taküm nung sentong akatsüji kangadang tongtibang. Sentong meyangluidang, tangar inyakerji aser tangar aorji ta sür wazüozüa libalirora takoksa aser tamakok dang ajurutsü,” ta ashi. Paisa tamakokji takok tongshi ta rajemja, taoba tatidang nung tamakok ngur alir shisaluyimertem dang züngkangshir aramesoang ta ayongzük.
Tang AKM-i ayonga agütsüba angati coaching indang tenüngsanga jembidang tongti tesemdanger-isa, ibai tamendakdak kimong ka lir anungji maongka tajung agiang aser asüng atema anüngzüka meyui tenzükadokang ta shisaluyimertem ajungshi. Paisa tamajung atema masü saka tajung inyaktsü atemabo yimya süba-ang ta ashiba den na kechi subject nung tashi mait lir iba atema mapang talila atakzüka sentong yanglur, temulung agüja aser meranga azüngtsü yimya süba-ang ta shia liasü.
Coaching class tenzüktsüba sentong nungsa AKM President, L. Jemti Longchar-ia pela-a agizükba O tatsüka jembidang, Taküm shia nükjidong/ nükla melira nükjidong metongtettsü. Nükla makaba taküm kaji rongyir maliba rong den sako. Anugnji tang AKM-i ayongba angati coaching class ya maongja tajung ka ama agia student ajaki temulung agüja aser meranga angazüktsü merangang ta ayongzük.
Easter, Women coordinator AKM-i ketdangsüa agiba sentong tali mera ketja Rongsenchila-i ken ka aten, AKM Asst. General Secretary-i temzüng ozüngtem zünga metetdaktsü aser Bendangkumba Aier-i tepela O jembia liasü.