NIA-i TR Zeliang den pa indang Personal Secretary jaoker

Kohima, Metsüremi (March) 27 (TYO): National Investigation Agency (NIA)-i taoba Chief Minister TR Zeliang den pa indang Personal Secretary K Francis Zeliang na Metsüremi (March) 31 nü jaokogo.
NIA-i tang agi asembenbuba TR Zeliang jaokogo. Metsüremi (March) 13 nü parnoki mezüng pa jaok. Sorkar department temi ozüngi noktanga aliba telungpur teloktem nem sen agütsüba ken o nung ajemdaker asüngdangya asütsü atema pa aja.
DSP NIA, Union Ministry of Home Affairs, Yogesh Rathore-i TR Zeliang dnagi züluba shidi ka nung “NIA DSP Jasveer Singh-i bushisüngdangba ken o nung na sendaktepa lir ama ajiteter” ta shia liasü.
Ajisüaka, iba mapang TR Zeliang-i NIA dang Metsüremi (March) 13 nungi budget session tenzüktsü lir aser iba jagi marutettsü ta shidi ka meyiptsü. Iba shidiji agizüka NIA-isa pa dang Metsüremi 17 nü arutsü atema tanaben jaok saka idangjia Zeliang-i Assembly session tagidak aliba ajanga pa marutettsü ta ashi.
Sangtennü Deputy SP and Chief Investigating Officer, Jasveer Singh-i Ex-Chief Minister T R Zeliang dangi züluba shidi nungji, Metsüremi 31 anepdang 10:00 ako nung pa NIA HQ, Lodhi Road, Opposite Jawaharla Nehru Stadium Metro Station, New Delhi-i arutsü atema shia lir.
Jasveer Singh-i Zeliang dang sorkar department nungi sen agütsüba indang kulikakettem bener kechi südir süaka arutsü atema metetdaktsü.
NIA-isa PS to Ex-CM, K Francis Zeliang dangi shidi balaka yokba nung kasa anogo nung NIA HQ-i arutsü atema shia lir.
Jasveer-isa ashiba agi, Metsüremi (March) 25 nü apuba sorkar ketdangser asemji Dimapur nung NIA Court-i anir ao aser parnok anogo ana police ket nung ayutsü atema temelaba nguogo.
Par asemji asüng okadaki anir aotsü aser judicial custody atema asüngdangtsü, ta paisa shisem.
Luroi (August) 2016 nungi NIA-i Nagaland nung tashiyim agi sen saruba ken o tem bushisüngdanga arur.