BJP-i ‘no-confidence motion’ tsübur

Lok Sabha nung Speaker Sumitra Mahajan-i ‘no confidence motion’ benokba magizüker aser iba atema opposition temi lungkak aitba ajanga senden junga mementeter. Taküm Budget session tenzükba sülen nungi opposition temi lungkak aityonga aruba ajanga Lok Sabha aser Rajya Sabha nung senden junga magiteti arua lia Andhra Pradesh nungi Telugu Desam Party aser YSR Congress teloktemi mezüng Centre sorkar anema ‘no confidence motion’ tem benok aser ano anogo ishika dang lir CPI-M aser Congress teloktemia kasa ‘no confidence motion’ benoka liasü. Bharatiya Janata Party (BJP)-i aniba National Democratic Alliance (NDA) sorkari Lok Sabha nung no-confidence motion madak takok angutsüji melamelar kechiyong parnok nübo teimba lir aser parnoki trust vote ka ajanga opposition madak takok angutsü. Ajisüaka, Lok Sabha Speaker Sumitra Mahajan-i opposition temi benokba no-confidence magizüker aser lai iba atema tatemtsü ambaji ‘no-confidence motion’ benoker o atsüteptsü atema House tiptema mali ta ashir. Ajisüaka, iba tatemtsüji ajanga Modi’er sorkari no-confidence motion atema o atsüteptsü memulunger ta sayur. Parliament session tenzükli Congress-i Nirav Modi-Punjab National Bank ken o benoka o atsüteptsü takhangba agütsü saka Telugu Desam Party-i Andhra Pradesh atema special category status meshia lungkak aitba den ano YSR Congress-ia kasa onük atema takhangba agütsüba ajanga Congress-i benokba onükji nembangtsü. Mezüngbo, TDP aser YSR Congress teloktemi Nirav Modi onük nungi Modi’er sorkar jenbudaktsütsü meranger ta bilem saka TDP-i Metsüremi (March) 16 nü NDA teloktep nung madentsü lemtetba aser ano Modi’er sorkar anema no-confidence motion benokba ajanga Modi’er sorkar jenbudaktsütsü merangba tebilemba tu agien. Mezüngbo Modi’er sorkari Nirav Modi onük atema o atsüteptsü memulungi liasü saka tangbo parnoki dangi onük aika aruogo kechiyong parnok anema no-confidence motion benokbaji onük ka atema dang masü saka aika atema lir. Iba ajanga opposition züngsemtemi sorkar anema jembitsü maongka peria angutsü ta meteta dang aliba agi Prime Minister Modi-i Parliament nung o atsüteptsü memulunger kechiyong parnok kanga tim atemtsü. Ano külen, BJP-i parnok den yaritepba teloktem atema shisabulur kechiyong parnok den yaritepba teloktemi sorkar anema vote magütsütsü saka parnoki iba ya maongka ka ama agia parnok khurettem tali lemsateptsü akok. Andhra Pradesh nungi TDP-i BJP den tesentaktep pilaogo aser külen Maharashtra nunga parnok den yariteper Shiv Sena-i BJP den toktepba manener aser taruba election nung parnok (Shiv Sena) kija dang tokteptsü ta amokmerenogo. Punjab nunga Shiromani Akali Dal-i BJP dak temulung masüba metetdaktsüogo aser külen Lok Janshakti Party lennir Union Minister Ram Vilas Paswan-ia sorkar dang mepelaba metetdaktsüogo. Modi’er sorkar atema mapang tamajung ka nung no-confidence motion tem benoker asütsü. Linük nung aluyimertemi sorkar anema lungkak aitba manenba mapang ka nung, Centre-i rongsenkettsüng dak sendakba maparen junga meinyakba atema nisung aikati ola adokba mapang ka nung aser Centre sorkari mapa tasentem peria madokdaktsütetba atema aitsüba mapang ka nung sorkar anema ‘no-confidence motion’ tem benokogo. Ano, Gorakhpur aser Pulphur by-election tem nung BJP-i tamakok anguba ajanga BJP pur atsüdaka alitsüsa akümer ama ajiteter. Taküm Monupii (May) nung Karnataka Assembly election agitsü lir aser iba ama mapang ka nung Modi-er sorkari o atsüteptsü tasü maiter südi. Ajisüaka,  kechi komar ka asüyonga Lok Sabha Speaker-i no-confidence motion temji agizüktsüla aser ibaji asü nung dang sorkar tashi itta lir ta asüba kuli agütsütsü aser sorkar dak temulung malemba agientsü.