PMSBY aser PMJJBY schemes atema nisung aika enroll südar

Kohima, Metsüremi 28 (TYO): Linük nung social security schemes nisung ajaki jenjang dalang agi agitettsü nükjidong nung 2015 küm May ita 9 nü Ato kilonseri Pradhan Mantri Suraksha Bima Yojna (PMSBY) aser Pradhan Mantri Jeevan Jyoti Bima Yojana (PMJJBY) tenzükja liasü, ta ketdangsertem osang ka nung metetdaktsü.
Pradhan Mantri Suraksha Bima Yojna (PMSBY) scheme ajanga per annum züngsem shia sen 330 premium atema sen lakh 2 tashi life insurance agutsür (arishi küm 18-50 tsüngdapur ajaki agitettsü).
Ano Pradhan Mantri jeevan Jyoti Bima Yojana (PMJJBY) ajanga per annum züngsem shia sen 12 agi lendong ataloka asüba mesüra tenük-telen lemtaba atema accidental insurance sen lakh 2 tashi agutsür (arishi küm 18-70 tsüngdapur ajaki agitettsü).
Item schemes atema subscriber indang bank account nungi premium atema auto-debit süa enroll sütettsü, aser ibaji ajanga sensakertem aser makamaitertem aika ajangzüker.
PMJJBY aser PMSBY kübok nisung crore 18 ayimjemogo, ajisüaka ano nisung aika insure süa mali, ta sangdong nungsa shia lir.