NGRC-1 CU 2018 mezüngbuba Executive senden amen

Kohima, Metsüremi 28 (TYO): Nagaland Govt. Registered Class-1 Contractors’ Union (NGRC-1 CU) 2018 küm mezüngbuba Executive senden Metsremi 27, 2018 nü amen aser iba senden nung parnoki sorkar tasenba, NDPP-BJP Alliance (PDA) nem tenüngsang agutsüba den külemi, iba sorkari nüburtem atema lenla ajaklen junga inyaktsü imlar, ta metetdaktsü.
Chief Minister, Neiphiu Rio nem tenüngsang aguja Union-i pa dang contractors aser iba den sendaktepba departments mita reprangba ajanga mapa junga inyakba ajungkettsütsü mepishi.
Union-isa sorkar dang project fund nungi commissions balala, party fund atema sen mekatitsü mepishi; GST saru shilem aika asüba ajanga project nungi sen ajemer, ta Vice-President, NGRC-1 CU, S. Bendang Jamir aser President, Seyiekuolie nati sangdong ka nung metetdaktsü.
Ano mapang shidak nung project tembanga inyaktsü atema ali kiburtemi tetsükdaktsü bener marutsütsüla mesüra project teinyakdak manentsütsüla, ta parnokisa metetdaktsü.
Open tender selection, bidding aser machinery requirements ajanga contractor tem nem mapa agutsür, anungji pa/la ali kibur asüba nung ajemdaker contract mapa magutsütsüla, ta parnokisa ashi.
“Taila contractors mita reprangtsü atema Union-i sorkar departments dang firm aser contractors tenüng, project nüngja aser mapa teinyakdak osang Union Office nem agutsütsü atema mepishitsü senden nung lemtet. Iba dak alia contractor nem mapa agutsüdang sorkari lisopur contractor nem tama maongka agutsütsüla,” ta sangdong nung shia lir.
M/S Gayatri & Maytas ama tangar nem SARDP-NE kübok – “Longleng-Chantongya road two laning, Mon-Tamlu-Merangkong lenmang, Phek-Pfutsero lenmang aser Zunheboto-Chakhabama lenmang’ contract mapa agutsüba ajanga takoksa tulu anguba aser tamakok anguba sorkari ajangshia lir, ta sangdong nung shia lir.
“Ano tang teinyakdak Dimapur aser Kohima lenmang ajanga National Highway anasa alir sensotemi timtem kanga ajangshidar, kechiyong contractor temi lenmang tejenba nung auyi mazüoktetter aser ali tusaba mebelenteter,” ta parnokisa ashi.
Iba senden nung executive züngsemtem aser Union legal advisor, Kezhokhoto Savi, Advocate densema liasü.