Zhaleo Rio-i Nagaland nung temelenshi bener arutsü ayongzüker

Dimapur, Metsüremi (March) 28 (TYO): NLA nung Deputy Speaker, Zhaleo Rio, IAS (Retd.)-i Metsüremi (March) 28 nü Medziphema nung NDPP office semdang.
Iba mapang pai Nagaland nung temelenshi bener arutsü atema nisung ajaki mapa tajung inyaktsü aser tangatetba tajung nung yariteptsü ayongzük.
5 Ghaspani-II A/C nungi MLA Zhaleo Rio-i party züngsem ajak dang pelaba metetdaktsü aser taküm Nagaland nung PDA sorkar kümtettsü atema yaritepba MLA ajak nem tenüngsang agütsü.
“Candidate karbo tekümzükertem ama lir saka nibo sorkar lendong nungi kümzüker ka ama lir” ta paisa ashi.
Zhaleo-isa constituency atema aser Naga nunger ajak atema bendanga agüja inyaktsü ta ashi aser iba atema nübortemi pa asoshi sarasademtsütsü aser pusema nungittsü mepishia metetdaktsü.
Naga nungertemi tai aputsü dang jangra kümogo saka asenoki iba tangatetbaji toktsür “Naga nunger’ ta asüba yangertsüla. Ibaji asenok longjemba, tangatetba tajung nung shisatsü agütsüba aser loktiliba nung telemsa balala ajak agizükba ajanga dang inyaktettsü, ta paisa ayongzük.
Iba sentong nung Chairman, NHHDC Miathou Krose aden aser pai o jembidang tamasa Tsüngrem nem tenüngsang agütsü.
Pa nem iba menden lemzüktsüba atema Krose-isa Chief Minister, Deputy Speaker aser PDA sorkar dang pelaba metetdaktsü.
Sentong nung mendenji 5 Ghaspani-II A/C President, Duosau Kuotsu liasü aser tesenteper ajaki sarasademer tenzük.