APSC ken o atema ketdangser 6 apu

Guwahati, Metsüremi (March) 28 (Agencies): Assam Police-i Assam Civil Service (ACS) aser allied services nungi ketdangser 6 puogo ta Rasemnü (Bodbar) osang metetdaktsü.
Assam Public Service Commission (APSC)-i sen melena mapa agütsüba inyakyim nung shilem agi ta tai tonglokja ketdangser trokji apu.
Sangtennü (Mongulbar) aonung Rituraj Gogoi, Kaushik Kalita, Satyajit Sarkar, Abhishek Borbora aser Barnali Devi nungertem tesem balala nung apu aser Joydev Mahanta ji tanep apu, ta Assam Police-i metetdaktsü.
Assam kübok Dibrugarh police-i 2016 nungi iba ken o atema bushisüngdang arur aser parnoki taoba APSC Chairman Rakesh Paul aser APSC züngsem ana- Samedur Rahman o Basanta Doloi nunger den APSC ketdangser asem apu.
Taoba ghonda 24 tsüngda ketdangser 6 apuba züngsem tang tashi nung iba ken o atema ketdangser 34 pua lir. Parnoki sen yong mapatem ayokba atema kuli tejanga bendena lir ta police-i ashir.
Taoba APSC Chairman Rakesh Paul nem süpokrem agüja mapa alizükertem kar ano bushidar ta parnokisa metetdaktsü.
2016 küm assistant engineer, Nabakanta Patir-i tetsür dentist ka nem APSC ajanga mapa agütsütsü ta nangzüker süpokrem meshia agidang Dibrugarh police-i pa apu. Iba ajanga APSC nung sen yong mapa ayokba inyakyim ya jungkai adok.
Tetsür dentist jagi police nem süpokrem meshiba osang sangoktsü aser ibaji ajanga Patir apu.