Arunachal nung tetsür chanu pezü samar bushia aliba nguogo

Itanagar, Metsüremi 28 (Agencies): Arunachal Pradesh kübok Lohit district nungi tetsür chanu pezü Metsüremi (March) 21 nungi samara bushia aliba South India nung nguogo, ta police ketdangser kati metetdaktsü.
Deputy Inspector General of Police (East) Uper Bitin-i ashiba agi, tetsür chanu tem ya arishi küm 12 nungi 16 tsüngda liasü aser parnok ya yashi Chennai aser Bengaluru na tsüngda train ka nung senzüa lia angu. Paisa ashiba agi, tetsürtem ya Government Railway Police sepaitemi ngutet.
Ajisüaka Home Minister Kumar Waii-i ashiba agi, tetsürtem ya Lohit district Superintendent of Police Issac Pertin-i Vellore police teyari nung parnok ya Vellor nung lir, ta bushitet.
Waii-isa ashiba agi, tetsür chanutem ya Kumaisi Pul (12), Anjalu Ngadong (16), Ashilu Yun (15) aser Kambli Chetry (14) nunger lir aser parnoki parnok mapa bushia ki toktsür ao, ta nangzüka liasü.
Tezu police station nung tetsür chanutem rongnung tetsü kati ken o benokba nung ashiba agi, parok ya Wakro nungi Metsüremi 21 nikongtsütsü sama aser parnoki tetsürtem ya nisung shibelenertemi pur ao asütsü, ta tsübua bilemer.
Tezu nungi police telok ka tetsürtem ya tani-i yokogo aser parnok anogo ishika tsüngda nung arua atongtsü imlar, ta DIG-i ashi.
Ajisüaka tetsür chanutem ya külemi sama asü masüar ajibo mejangja, ta Bitin-i ashi.