Lendong timtem mapang

Yisu Khrista taküm nung shisabolu mapang tulutibaji pa taküm temenenpurtem kümzüktsü asoshi alima nem bendanga agütsütsüba anogo anasai aitba mapangji liasü. Paia iba shisabolu aser timtemjibo pa kija tashi agibo metizüktet, anungji paia kenbo,  “Oba, nai mulungra, iba marok ni nungi agienangma,” ta sarasademba Luke tapu 22 tekong 42 nung angutsü. Ibai joko,Yihuda nunger arogo aser yimten nung lenirtemi anir Yisu aputsü aser kangki nung südaktsütsü anogo tonga aruba mapang liasü.  Iba jagi Pai par nütsüngtem den tepila o jembi aser parnok dang kechisa ataloktsü itemji shia liasü. Aji oda, pa mulung mesüngjemteti shisabolu tulu alinungji, Pai kanga sarasadem aser yamaji Par nütsüngtem danga sarasademtsü ajungshi. Paibo Pa taküm nung dang masü saka Par nütsüngtem taküm nunga kechi ataloktsü aji meteta liasü. Iba jagi parnok tamang nung tasü itdakja renemtsüba mapang, Pa nütsüng rongnung temulung kanga adoksang Peteribo pa kibuba Yisu Khristaji tangari tepsettsü ta mamang aser Tsüngremer sentong memetet pai Yisu metepsetdaktsütsü bilem. Ibayongji, Yisui Peter dang Satan aja. Yisu taküm lia par nütsüng terana rongnung Satan-i amshiba takümji Iskariot Yihuda denbo Peter dang liasü. Ajisüaka, Peterbo temulung meyiptsü taochi angu saka Yihudabo mangu, pasasa soseta asü. Taküm nung aiben timtem lendong aser shisabolu koktettsü asoshi tashi balaka nüngdaker. Iba tashi jagiang asenok shi azü tsütsü shisaboluba aser jangraba mapatem akoktsü. Iba tashiji Tsüngrem nungi angutsü. Ajisüaka, iba tashiji angutsü atema asenoka nükenbelema inyaktsü nüngdaker. Yisui kodang Pai mekoktettsü amato shisabolu aru, Pai sarasadem aser idangji kotak nungi tenyar kar adoka Pa tashi itdaktsü (Luke 22: 43). Tanüa asenok aliba lima aser putu tensa ya Yisu asütsü mapang, Pai nütsüngtem dang sarasademang aser saksalema liang ta ashiba amato saksaklema sarasadema alitsüba mapang lir. Ibai asenok shi aser tanüla nung anisüngzüka alitsüba mapang masü. Ajisüaka, Yisu parnok nungi tatsüka pilar sarasademer meyipa arudangbo par nütsüngtem ajak amui orr aliba medem, tanü asenok jakdang lendong timtem tulu ataloktsüsa tensa mapang tamajung agi meketbanger liaka, asenokbo shisamebului anisüngzüka alir. Asenoki sarasadem masür, amui mao maremer. Iba ama mapang ka nung asenoki meteta dang asenok chirnurtem taküm raksar, asenok kibongtem aika balalulatsüsa akümer aser asenok rongnung mangatettep tuluba aser telemsa teimba adoker. Tanü ama alima tensa mapang mejungi akümdang aser alima japujari mapatem agi asenok atsür aotsü merangdang, Yisui Mark 14:38 nung, ” Nenok tatidang nung metsüktsü asoshi saksalema liang aser sarasademang, nenok tanülai jangrar saka shi nung tashi mait,” ta ashiba o agi asenok ajungshidaktsütsüla. Ibai Yisu sarasademba mapang lir. Pa den külemi Pai asenok sarasademdaktsüner. Yisui tebu dang sarasasdem dang tashi tasen anguba amato asenok taküm aser kibong nung shisabolu khuret tulu liaka, itemji metsübui koktettsüsa Tsüngremi asenok tashi aser tasü itdaktsütsü. Atangji, aiben asenoki shisabolu khuret arudang, itemji agienjang ta sarasasdemer aser tatidang tarudaktsü ta mepishir. Ajisüaka, asenoki angatettsüba kaji, alima nung ali tashi asenok shisabolutsüsa khuret aika lir aser alima shi tatidang ajurutsüsa lenmang aika lir, anungji itemji koktettsü asoshi Tsüngrem dang tashi tasen meshitsübaji kanga tongtibang lir. Aji oda, kü dangi khuret tarudaktsü ta masü mesüra tatidang tajurudaktsü ta masü saka khuret aser tatidang aruba metettsüsa saksalema alitsü aser itemji koktettsüsa tashi tasen meshia teti sarasadema alitsübaji Yisui pa kangkidongi matudang asenok dang shir aoba teinyaktsü mapa ka lir. Takokba Khristan taküm ka asütsü asoshi ayongayonga alitsüba mapang mali aser sarasadem mesüi alitsüba anogo maka. Iba jagiang, tenyar Paul-i pai taküm piyong rara tajung raraogo ta ashi. Ibaji anogo shia tanüla tongpang nung shi jangraba anema raraba otsü lir. Pa amaji asenoka anogo shia tongpang nung nokdaker taküm kaka lir. Paul amaji asenokia tongpangji anogo shia koka raratettsüsa saksalema lidi aser meneni sarasademdi.