Yisu Khrista den Asü Pila O (Good Friday Eulogy)

– Tiatoshi Longkümer, Kohima.

Temeimbatem, tanü anogo ya tanga anogotem dang nungi khenyongi balaka lir. Alima ajunga nung tanü anogo ya Khristantem asoshi mangyimba anogo ka lir (a day of mourning). Asenok ajaki meima aser teimla tulu nung aliba nisung ka pa sempartemi kanga rishikangshia tepsetba indang angashir iba mangyim jashi lemsateptsü tanep temeshi tenla ki ajunga nung adenshia sarasademteper.
Asenok ajaki teti angashia aser tamang tulu nung aliba nisung ka, shiba tenüng agi Yisu lir, pa süogo. Pa joko taküm mali. Aser iba osang ya asenoki osangzülur Mathi, Mark, Luke, Yohan aser Paul ajanga angazüker.
Yisu Khrista asüba ya alima yimya ka agi asüba masü. Pa ya alima tashidak kati tonger shiranga asüba ka masü. Pa yabo kanga rishikangshia, mezüngmeshia, züka-merenshia, nok-o-nü agi tepsetba lir. Ano osangzülurtem jagisa ashiba agi, Yisu Khrista tepsetba yabo asenoki kodanga mangashidangba aser mamshidangba inyakyim ka ajanga rishikangshia südaktsüba yimya ka, koba dang “Kangki” ta ajar, iba nungji alener, kojal agi angena nü agi tsüngset ta ashir.
Yisu ya tetsü ka ajanga asoba nisung ka dang. Pa-a shi-azü keter na aser ni ama pela taküm arishi anogo talang linüba taküm ka. Ibayongji pa tasütsü mapang nungangsüng pai tebu Tsüngrem dang iba tasüba agienjang ta mepishi. Saka pa Kangkidong nung asütsübaji tebu Tsüngrem sentong liasü.
Asen temang shi iru dang koda kangshir yamaji Pa temang nunga kesa timtim liasü. Atangji, Pa rishikangshiba, Pa mezüngmeshiba, Pa dak azükba, aser Pa dak azü alua atsüngba yimya yabo asenoki kodanga maremtettsüba timtim onsara tulu iba nisungi ajuruogo. Isaia 53: 5, “Saka asen ozüng raksaba asoshi Pa dak zübu aket, asen tai menaba atema Pa temang mendaktsü, asen tesünep asoshi Pa dak temerenshi atong; aser Pa dak azükba agi asenok anepa lir.”
Iba tuoshi-tekangshi tulu ya asen kibong ka nung ataloker asübo aseni ya aremzüktetdima? Iba ya nüdi dang, nenu dang, mesüra ner tsürabur ka dang tangari kesa ya inyak asübo nai tetepseter dang tatok agütsütetdi ma? Ni asoshibo iba ya kanga dang tasak asütsü. Saka Luke 23: 34 nungbo ashir, “Iba ama timtim tia nungangsüng pai Tsüngrem dang mepeshi, ‘Oba, parnok dang tai tokang, kechiasür parnoki kechi inyaker aji parnoki memetet.” Pai Pa rishikangshir aser Pa tepseter danga Pa tasütsü tashi nung tatok agütsüba tashi yabo ali meimchir tashi agi dangbo masü. Pa ya atangji Tsüngrem chir Yisu Khrista, shiba “taochi aser temeim” agi sünga lir.
Yisu asoba mapang kotak tenyari Pa ya “yimjung chuba chir” aser “nisung rongnung tesünep” abensang ta ayimoktsü. Saka Pa sor küm 33 buba nungbo azü tokshiba tulu ajanga Pa asü. Pai yimjung ken tena yimjung aser tesünep mapa inyaka aru, saka alimaibo Pa azü tokshiba tulu nung tepseta endok. Pa temeim, taochi aser ochi agi sünger Pa taküm ali, saka asen meimchiri Pa dak tekülak benshi, Pa ashioktsü aser tashiyim agi Pa aitsür Kangki nung südaktsü.
Süra, kechiba Pai bener aruba yimjung aser tesünep yabo aseni benshitsü makoker? Kechiba Yisui inyakba temeim yabo asenoki inyakba temeim dang nungi balaka? Kechiba Pai sayuba ochi aser temeshiba yabo aseni angatetba ochi aser temeshiba dang nungi balaka? Ya Kechi agi asen meimchir taküm dang nungi nisung chir Yisu ya balaka?
Laishiba jagi ashir, alimai aitsür kangkidong nung angenlokba Yisu yabo temenen maliba taküm ka. Saka tetsüpok nung bena-a asoba meimchir takümtem yabo asen “pei tetsüpok nung alidang yongi temenen nung aben” ta T. ken zülur jagi ashir (51: 5). Ano Rom 3: 23, “Kechiyong ajaki temenen mena aser Tsüngrem sentsüwangshi matonger.” Atangji, asenok aser nisung chir Yisu na piladaktsüba teraji “temenen” lir.
Tetenzük nung, asenok Tsüngrem mesükba nung yangluakasa, teyanglur Tsüngrem aser meimchir tsüngdai temenen aitadok nung, iba tesendaktep raksatsü aser asenok ajak “tesamaba san ama lenmang aia ao.” Memichir-i temenen tekelakoktsüba ajanga tebu Tsüngrem nungi atsünga oadokakasa, tebu Tsüngremibo iba tesendaktep kodanga meraksa aser asen mesendok, aser Pa dangi meyipa arutsü yongyaseta atar.
Saka aseni Pa dangi meyiba aotsü momolung nung tebu Tsüngremi Pa chir ka dang aliba alima menen alangzüktsü asoshi yok ta Yohan 3: 16 jagi ashir. Iba yagi sayur, Yisu Khrista alimai marudangyongi Tsüngrem mulungjangbo meimchir meimba agi sünger liasü. Aser iba temeimji Pai Pa mulungjang nung rema meyutet nung Pai Pa chir ka dang aliba asen menen asoshi agütsü.
Asen menenpur ka, kecha tajung matenbapur ka kümzüktsü asoshi Tebui Pei jabaso taküm tenla agütsüba tashi aser temeim ya kong nungi adok? Aseni Pa asoshi kecha tajung meinyak sürnung, Paibo asenok asoshi tajung dang inyaktsü mulunga aliba Tsüngremer temeim ya koda tesüngmangtsü. Asenoki Tsüngrem nungi jena oa saka Paibo asen bushia aru aser asenok nem taküm agütsütsü atema Pa Kangkidong nung asütsü tashi arem.
Aji oda, tebu Tsüngrem aser techir Yisu Khrista asoshi tasaktiba mapangji Kangkidong nung metaba mapangji liasü. Yisu Khristai iba Kangkidong nung Pei Tebu Tsüngremi sendokba ajangshi nung Pai Kangki nungi ayimten, “O kü Tsüngrem, kü Tsüngrem, kechiba nai ni toktsür?” Ano tebu Tsüngremia Pei Chir kümzüktsü makokba mapangji iba Kangkidong nung ya liasü, “kechiasür ya Tsüngremi mulungba liasü.” Atangji, tebu Tsüngrem mulungjang Pei Jabaso timtim-a asüba ngur raksaba nungi adokba temeim yabo kecha agia medemdangtsü makokba temeim lir. Pa mulungjang raksa-a Kangkidong nung timtima Pa taküm agütsüba ajanga asenoki Tsüngrem temeimji angateter.
Yisu Khrista timtema Kangki nung asüba nungji asenok pelar masü, saka na aser ni ama teraksa taküm ka alangzüktsü aser tabensaba taküm agütsütsü Pai inyak nung iba mapa nung süngmangseter, aser iba meim yabo koda tulu ta bilemer. Atangji, tanü iba Good Friday anogo nung Yisu Khrista asüba osang tulutibaji ya lir: “Yisu Khrista temang khenyongi tenlaba agi asenok meshitetogo” (Ibri 10:10). Amen.