Mon nung DAPCC senden amen

Dimapur, Metsüremi 29 (TYO): DC Conference Hall, Mon nung Metsüremi (March) 28, 2018 nü Mon indang Deputy Commissioner, Thavaseelan K, IAS lenisüba nung District AIDS Prevention & Control Committee (DAPCC) senden ka amen. Senden nung adentsü arur pela agizükba o jembiba mapang, Deputy Commissioner-i iba Committee nung aliba sorkar departmentem, lokti dentet balala, arogo lenirtem, kaketshir, NGO, medical aser para medics tem dang district nung HIV tashidak nungi kümzüktsü asoshi pei tangatetba aser teinyaktsütem lemsateptsü ajungshia liasü.
District nung HIV aser AIDS nungi jenbua alitsü asoshi NSACS teyari amshia DAPCU aser partners temi 2017-18 mapang inyakba aser anu teinyaktsü mapatem, DAPCU Mon nung District Programme Officer, Longyim Tzudir-i iba senden nung metetdaktsü. Iba senden nung shisa lemsatepba mapang, HIV aser AIDS nungi kümzüka alitsü asoshi yimtsüng aser block level nung leadership training agütsütsüla aser iba mapang DRDA, Social Welfare Department, Education department, District Public Relation Officer, Churches Association aser District Legal Service Authority den longjemer inyakba ajanga dang mapa nung takok angutsü, ta jembia liasü.
Voluntary Blood Donation (VBD) indang jembiba mapang, Mon District Voluntary Blood Donors Association aser Red Ribbon Club temi meranga inyakba asoshi züngsemtemi pelaba lemsatep aser maneni iba sentong nüburtem nem tali angatetdakja inyaktsü ajungshi.
Outreach Gospel Ministry ajanga temesepba mozü achirtem nem Free Detox agütsüba indang lokti den lemsapet aser maneni Monupii (May) 2018 nung Free Detox camp ka Mon nung akatsü, ta parnokisa ashi. Iba sentong takok ngua agitettsü asoshi district administration teyari agitsü, ta parnokisa shisem.
PLHIV atema teyari agütsüba indang jembidang, senotsü teyari peria maliba ajanga iba sentong ya Mon tezülen aliba PLHIV tem nem magütsüteter, ta Dr.Yingnei K, MO I/c ICTC & LAC+ DH In-charge, Dr. Yingnei K, MO-i ashi.
Kasa senden nung Dr. Tiasunep, DTO aser Ingaupeule, OST Counsellor DH nungeria jembia liasü.