VIP nem Professors melemzüktsütsüla: ANCSU

Kohima, Metsüremi 29 (TYO): All Nagaland College Students’ Union (ANCSU)-i shidi ka ajanga Higher &Technical Education Minister dang VIP den Asso. Professors/Asst. Professors mapa lemzükja lira ibaji agientsüla, aser Asso. Prof/Asst. Proffesor tem VIPs den mapa melemzüktsütsü mepishia metetdaktsüogo, ta tanü ANCSU tatong Tir, Benjong Longchar aser tongti tezülur, Vimeyiekho Vitso nati sangdong ka nung metetdaktsü.
ANCSU-i Minister dang, kaketshirtem terenlok, talisa kaket rejutem renloktsü atema lecturer temji pei nem lemzüktsüba reju nung tesayur mapa inyaktsüla, anungji Assistant Professors/Associate Professors tem VIP nem lemzüktsübaji Union-i maginer, ta metetdaktsü.
Anungji kaket rejutem nung kongshia kaketshirtem takoksa mangutsü atema Union-i iba onük ya süoki ia agia Assistant/Associate Professors tem VIPs nem lemzüktsüba melelatsü atema mepishir, ta ANCSU-i mepishia metetdaktsü.
ANCSU-i iba onük nung mita alitsü aser kaketshirtem takoksa angutsüsa inyakba mapatem kecha magizüktettsü, ta kasa sangdong ajangasa metetdaktsü.