Leonardo indang ‘The Beach’ film tangokdak beach shibangtsü

Metsüremi 31, 2018 (Agencies): Thailand nung ketdangsertemi Maya Bay shibanga ayutsü asoshi tetuyuba agütsüogo. Iba beach ya Leonardo Dicaprio indang film ‘The Beach’-i nüngtugu kümdaktsü . Iba tetuyuba ya raliwalirtem tali aruba ajanga tzü mopung raksatsüba yanglushitsü atema lir.
Iba telemtetba ya Thailand national parks and wildlife department-i Rasemnü agia liasü. Maya Bay beach ya Andaman tzüyim nung lir aser iba asetkong indang coral reefs aser tzü nung aliba süngtonglidong aser taküm aliba shirurutem renlokdaktsütsüba atema Aami (June) nungi tenzüka ita pezü tashi shibanga ayutsü.
Arem shiruru tem dak kongshiba tajemba kümdaktsütsü nükjidong nung Thailand marine national parks tem timbaka raliwalirtem atema Monupii (May) tesadang ka nungi Mongputeni (October) tesadang ka tashibo shibanga ayur.
Leonardo DiCaprio-i tongti shilem agiba film ‘The Beach’ ya 2000 küm sayaa liasü.
Danny Boyle aser par film crew temi Maya Bay nung 1999 küm Alex Garland indang otsü kaket nung ajemdaker ‘The Beach’ film ya tangokba nungi tenzüker iba beach ya raliwalirtem takhangba peridaktsütsü atema küm tepeyong lapokja liasü.
Iba asetkong ya küm 19 buba anogoshia rong 200 aser raliwalir 4,000 shi-i semdanger. Tawa marine biologists temi bushisüngdangba nung ngutetba agi, iba beach nung coral reefs shilem tuluka raksatokogo aser tzüyim nung aliba süngdonglidong aser shirurutem aiak samaogo.
“Iba ya nisung ka küm aika khen danga maneni dang inyakba mesüka lir,” ta Thailand national strategy committee on environmental development züngsem Thon Thamrongnawasawat-i ashi. Paisa ashiba agi, raliwalirtem aika senokba ajanga beach tebor ajung ajak samaogo aser mapang tatsüka iba beach ya shibanga ayutsü nüngdaker.
Maneni iba ya lapokba sülen raliwalirtem anogoshia tang dang nungi tesadangi dang semdangdaktsütsü aser rongtem tzüküm nung manendaktsütsü asoshi ketdangsertemi telemtetba agiogo.