Tibet nungeri India nung refugees ama mebilemtsüla: Ram Madhav

Dharamsala, Metsüremi 31 (Agencies): Tanü BJP general secretary, Ram Madhav-i, Tibet nungeri par tetsü taso limai onüba atema onoki pelar; India nung alibaji refugees ama nenoki mebilemtsüla, ta ashi.
Tibet nunger yimsü lenir, Dalai Lama India-i aruba sülen küm 60 ajungba nüngtem nung Tibet sorkari “Thank You India” campaign kübok küm ka piyong benjungmong tanü tenzükogo.
Tanü McLeodganj, Himachal Pradesh nung iba benjungmong sentong nung jembidang Madhav-i, “Tebilemtsü khuret alirtem India-i pelaa agizüker. Nisung aika refugees ama India-i aru, aser yangi parnoki temeim den tejenokdak angu. Refugee ka takümji kanga tasak aser timtem jenti lir, ajisüaka Tibet nungeri refugees ama mebilemtsüla, kechiyong parnok tanabuba kidang alir,” ta ashi.
Paisa, shidakba agibo Dalai Lama dang ang kanga pelatsüla, kechiyong pai Buddhist nunger shisashir aika anir India-i aru, ta ashi.
“Küm 1,300 tejaklen anüdoklen India nungi Buddhist yimsü ya Tibet-i ao. Asenok tanela, tamangba yimsü, sobaliba aser shisatsü agi sendaktepa lir, anungji asenok adianutem lir. Asenok kati ka dang pelaba lemsateptsü menüngdak,” ta pai ashi.
“Nenoki ner tetsü taso limai onüba atema onoki pelar, aser onoki nenok atema tajungtiba bilemtsür. Iba tanela ya mesamatsüla. Ibaji matalok tashi India ya ner lima. India ya Buddha, Mahatma Gandhi aser Dalai Lama nunger lima,” ta Madhav-i ashi.
Kasa sentong nung Union minister, Mahesh Sharma aser BJP MP Shanta Kumar natia jembia liasü.
Iba sentong ya Delhi nung agitsü sentong liasü, ajisüaka India-China tesendaktep kongshitsü tsububa agi ketdangsertemi Dharamsala kübok McLeodganj nung ang agitsü tuyua liasü.