Ghonda 24 tsüngda UP nung Ambedkar kürakyanglu ana raksatsü

Lucknow, Metsüremi 31 (Agencies): Uttar Pradesh, Siddharthnagar kübok Gohaniya nung Dalit nunger lenir, B R Ambedkar indang kürakyanglu ka raksatsüogo, aser ibaji ghonda 24 tsüngda Ambedkar indang kürakyanglu tanabuba raksatsüba liasü.
Rogonü aonung mejangjaba nisungtemi Ambedkar indang kürakyanglu raksatsüba sülen lisopurtemi longkak ait.
Ano tanep Uttar Pradesh, Allahabad kübok Jhunsi nunga Ambedkar indang kürakyanglu ka raksatsü. Mejangjaba nisungtemi kürkyanglu tekoklak mejungi raksatsü.
Ato kilonser, Narendra Modi aser Ministry of Home Affairs-i linük nung kürakyanglutem meraksatsütsü atema tekümdangtsü metetdakja liaka linük tesem aika nung nüngtugu nisungtem indang kürakyanglu raksatsüba manener. Tesüiba ita ishika tsüngda linük tesem balala nung kürakyanglu aika raksatsüogo.
Taoba hopta Jaisalmer nung Mahatma Gandhi indang kürakyanglu raksatsüba ken o nung Rajasthan Police-i nisung ka puogo. Anogo ishika jakdang West Bengal, Katwa nunga linük nung mezüngbuba Ato kilonser, Jawaharlal Nehru indang kürakyanglu ka raksaja liasü.
Ano tan ita tetenzüklen Assam, Kokrajhar nung Bharatiya Jana Sangh tentetsang, Syama Prasad Mukherjee indang kürakyanglu raksaja liasü. West Bengal, Purba Bardhaman district nunga aso 19buba Bengal renaissance mapang sangro zülur nüngtugu, Michael Madhusudan Dutt indang kürakyanglu raksaja liasü.
Tripura assembly election osang sangdongba sülen mejangjaba nisungtemi Tripura nung Communist lenir, Vladimir Lenin indang kürakyanglu raksatsü, aser iba mapang nungjagi tenzüka linük tesem aika nung nüngtugu nisungtem indang kürakyanglu raksatsü tenzük.