VK Singh-i India nunger tasümang 39 Iraq nungi bener arutsü

New Delhi, Metsüremi 31 (Agencies): Mosul yimti nung ISIS kiralongrartemi tepsetba India nunger tasümang 39 bener arutsü atema Minister of State for External Affairs, VK Singh, Iraq-i aotsü, ajisüaka iba atemaji Baghdad ambassador dang nungi temelaba osang atadar, ta sorkar osang ka ajanga metetdaktsü.
Iraq Ambassador-i temelaba agutsüba sülen India nunger tasümang bener arutsü atema pa C-17 plane tayimtsü ka nung Iraq-i aotsü, ta Singh-i metetdaktsüogo.
Minister-i, “Baghdad ambassador-i temelaba agutsüli onok C-17 tayimtsü ka nung orr tim akhüm agutsüba sülen tasümang bener arutsü,” ta metetdaktsü. Minister-isa, India nunger tasümang ajakji par kinüngetem ket nung agutsütsü, ta metetdaktsü.
“Onoki tasümang ajakji parnok kinüngertem ket nung agutsütsü. Parnok tayimtsü anendaki arutsü menüngdak,” ta paisa ashi.
Congress party-i, External Affairs Minister Sushma Swaraj aser Singh nati India nunger asürtem indang kinüngertem dang yazü jembia aruogo, ta aitsür.
Tawa Lok Sabha nung Sushma-i Iraq nung asürtem maitsü jangjaba atema VK Singh nem tenüngsang agüja liasü. Lai, “Tasümangtemji Baghdad-i yokogo. Tasümangtem jangjatsü atema parnok kinüngertem indang DNA samples yok, aser iba maparen nung state pezü sorkar – Punjab, Himachal Pradesh, West Bengal aser Bihar densema lir,” ta metetdakja liasü.
Swaraj-isa, VK Singh, Iraq nungi meyipa aruba sülen tayimtsüji mezüng Amritsar (Punjab)-i aotsü, iba sülen Patna (Bihar)-i aotsü, iba sülen Kolkata (West Bengal)-i aotsü, ta metetdakja liasü.