India-i Sri Lanka madak takok ngua otsü tasen yanglur

Sri Lanka madak Test series asaya points 2-1 agi akokba sülen India’er cricket teloki takok marok bener arok noksa agitsü asoshi ataba yangi angur. (Colombo, September 01)

Colombo, September 01 (Agencies): Sri Lanka den asayaba 3 buba aser tatembangbuba Test asaya runs 117 agi koka India teloki tanü Mongolbar nü otsü tasen ka yangluogo.
Sri Lanka captain, Angelo Mathews-i tanü kanga meranga asaya saka India-i par telok madak 3 buba Test asaya koka par linük ana tsüngda Colombo yimti nung asayaba Test asaya points 2-1 agi akok.
India-i tan takok anguba ya küm 22 tsüngda nung tan mezüngsüa Sri Lanka nung Test series asaya akoker lir.
India-i yashi, Hombar nü tashi nung takok angutsü asoshi wicket 7 agitsü nungdaka liasü aser par teloki tanü iba alizüngji atongba ajanga India Test captain akümba sülen Virat Kohli nem mezüngbuba takokba bener arutsü.
Tanü asaya nung Mathews-i runs 110 aser tan mezüngsüa Sri Lanka tenüng nung Test asaya nung shilem agisang, Kusal Perera-i runs 70 agia kanga meranga asaya saka par teloki tamakok angutsüsa aküm.
“Ozü teloki takok ngua asayaba atema kanga pelar. 1993 küm sülen tan mezüngsüa takok ngua otsü yanglutetba atema kanga pelar,” ta sempet agizükba sentong nung Kohli-i metetdaktsü.
India asoshi runs 145 tashi yanglusang, Cheteshwar Pujara-i ‘Man of the match’ sempet aser wicket 21 tashi India atema agisang agisang, Ravichandran Ashwin-i ‘Man of the series’ sempet agizüka liasü.
Ano külen, Sri Lanka asayartem den aiben raratepa ICC indang Code of Conduct ozüng raksaba ken o nung aitsüba sülen India’er tongti bowler, Ishant Sharma nem taruba Test asaya ka nung shilem magidaktsütsü temerenshi tanü agütsüogo.
Iba temerenshi agizükba yong, Ishant-i taküm November ita 5 nü South Africa den Mohali nung asayatsü aliba 1 buba Test asaya nung shilem magitettsüsüa kümogo.
Ishant dakalaka, Sri Lanka asayar Dinesh Chanimal nem ODI asaya 1 nung shilem magitsü aser külem sensopur Lahiru Thirimanne aser Dhammika Prasad na dang match taa sen noklang nung shilem 50 senchi achiba osang jangjaogo.