Rongchii (April) 14 nü ASU Shillong Golden Jubilee amongtsü

Dimapur, Rongchii (April) 04 (TYO): 1968 küm tentetba, Angami Students’ Union (ASU), Shillong-i Golden Jubilee Rongchii (April) 14, 2018 nü U Soso Tham Auditorium, Shillong nung “Rise and Lead” omen nung ajemdaker amongtsü.
Naga Students’ Union Shillong kübok tentetba tejenpur rongnung ASUS densema lir aser Angami Students’ Union Kohima kübok tentet tulu ka lir.
Iba sentong nung tongti tesemdangerji Zhaleo Rio, Deputy Speaker, Government of Nagaland aser tetushi tejaokerji R. G. Lyngdoh, Fomer Vice Chancellor, Martin Christian University Shillong asutsü.
Iba sentong nung Nagaland aser Meghalaya naprongla nungi alumni aser tongtibang nisungtem adentsü.
1950s mapang nung Angami nunger kari Shillong nung azüng tenzük aser 1968 küm Angami nunger telongjem aser nüngdakba mapang nung yariteptsü atema mezüngbuba Tir, Kevisiezolie Suohu süa kaketshir tentet ya tenteta liasü.
Tanübo ASUS nung taoba mapang züngsemtem aika lokti nung kanga tongtibang nisungtem kümogo, iba denji külemi sorkar mapa aser public administrative offices nung tongtibang nisung aika adokogo.
Organizing Committee Convenor, Lhouvirielie Üsou-i Union tenüng nung iba benjungmong sentong nung adentsü ajak pelashishia jaoker, ta metetdaktsü.
Iba Jubilee mong sülen tanga anogo ka nung Kohima nunga Golden Jubilee Celebration dak sendakba sentong ka den Alumni telongjem sentong ka reptepa amongtsü.