Ministry ajak nung RSS nübotem mena lir: Rahul Gandhi

Davanagere (Karnataka), Rongchii (April) 4 (Agencies): Narendra Modi’er sorkari reju aika akhüm metsübur aser raksatsür ta Congress tir Rahul Gandhi-i tanü ashi.
Ministry shia nung RSS züngsemtem anioka tetuyuba agütsüdaktsüba ajanga Centre sorkari rejutem raksatsür ta Karnataka kübok Davanagere tesem nung nüboyimba sentong ka nung Rahul-i ashi.
Congress nem sorkar akümtsü tashi agütsüra RSS-i alenbanga aliba rejutem salatsütsü ta paisa ashi.
“Union minister indang office shia nung RSS nübo ka ka mena lir aser parnoki tetuyuiba agütsür. Anungji asenoki parnok dang nungi kechi imlatsü. Parnoki rejutem sensatsür. Iba ama inyakyim aliba ajanga asen linük nung banking system raksatsüogo” ta Rahul-isa metetdaktsü.
“Nirav Modi aser Mehul Choksey naji shiba? Reserve Bank of India ama senotsü reju akhüm metsübudang item ama nisungtem adoker” ta paisa ashi.
Punjab National Bank ochimashi ken o nung Nirav Modi aser tebu tanubo Mehul Choksey na tongti süa tai tonglokja lir.
Sangtennü (Mongulbar) Rahul-isa sen crore 650 ken o ka adokba nung Union Minister Piyush Goyal tesentaktep aliba atema tai tongloktsü.
Taoba RBI Governor Raghuram Rajan-i demonetisation masütsü atema tebilemba lemsatep. Prime Minister-i demonetisation sentong atongbaji chief economic advisor, Union finance minister aser Cabinet ajungai memetet liasü, ta Congress tirisa ashi.
“Cabinet züngsem ajak demonetisation masüdang shibanga ayu. Cabinet minister ajak taktang nungi kimai maludaktsü” ta Rahul-isa shisem.
Congress-i komaser mapa manguba khuret koktettsü ta asüngdangdang Rahul-i “construction, agriculture aser tanga sector tem nung small & medium scale business tem tenzüktsü atema ajungmesotsü” ta langzü.
China-i mapa aika adokdaktsüteter kechiyong par sorkari skill training agütsür, saka Modi’er sorkaribo skills sayutsü indang tejembia mejembir” ta paisa ashi.
“Bank temi small & medium scale entrepreneur tem nem loan agütsütsüla saka iba maongka ya Indian business nung mongin nisung 15 nem dang agütsür. Anil Ambani-i sen crore 45,000 loan lir aser pa yaritsü atema pa nem Rafale (fighter jet) contract lemzüktsü” ta Rahul-isa metetdaktsü.
Ajisüaka, taoba mapang Ambani-i Congress lennir Randeep Surjewala nem shidi ka agütsüba nung, Dassault-i Reliance shimba nung sorkar ana shilem kecha mali saka corporate private sector ana tsüngda dang telemtetba agiba liasü, ta metetdakja liasü.