Election nung nangzükbatem mezüdoki inyaktsü: Metsübo Jamir

Mokokchung, Rongchii 4 (TYO): 27 Mokokchung Town Assembly Constituency nungi adoksang Nagaland Urban Development & Municipal Affairs Minister, Wb. Metsübo Jamir’er kibong-i par ki Sangtemla Ward Mokokchung nung tenüngsang agütsüba sentong ka ayongzüka liogo.
Pai iba sentong nung jembidang, pa election-i aibaji shinga anema masü saka nübur asoshi noktaker ta asüba nükjidong yur aiba ama, iba tangatetba nung maparen ajak inyaktsü, ta metetdaktsü.
Election mapang pai constituency pur asoshi teinyaktsü kechisa nangzükogo, item ajakji mezüdoki aser tenangzükba meraksai akok tashi inyaktsü, ta shiogo. Election mapang pa den yariteper ajak dang pelaba o den külemi tarutsü nunga kasa tangatetba nung maneni amalitepa aser nungita yaridaktsünür, ta paisa mepishia ashi.
Iba sentong nung 27 Mokokchung Town A/C kübok aliba; Mongsenbai, Kumlong, Aongza, Kichutip aser Salangtem ward-tem nungi ward yimden ketdangsürtem den Nationalist Democratic Progressive Party (NDPP) Mokokchung Region, Ungma putu yimsüsür, Longsa Union, Changki Union, ministerbar kinunger aser par constituency nungi tebu-tedi kari mapang tatsütsü agia tepela o den tayongzükba o balala jembia liasü.
Iba sentong temer külen Minister Metsübo-i osangbenertem den mapang tatsüka agia jembidang, Municipal Act nung koba asenok dak mapetba onüktemsa lir, itemji tajungtiba nung yanglushir tekaratiba nung mapa kümteta inyaktsü tebilemba lir, ta ashi. Nagaland nung municipal election magiba ajanga tongtibangsa terenlok tsütsü asenok lenmang aisü nung takoksa ajurudaki, ta paisa shisem.
Paisa inyaka aotsü indang kar lemsatepdang, terenlok maparen ajak timtem madoktsü atema yimtsüng (rural area) o jila (urban) na bentet-benteta yur inyaktsü aser meimchir dak aketba sempettem renlokba maparen (human resources development), yimti nung janaona anepalubayim aser merük-mejuba mapatem inyaktsü tebilembatem ashi.
Sentong nung Mokokchung Town Baptist Arogo (MTBA) Pastor, Rev. Ponen Longchar ajanga Tsüngrem o tarok bener arua tesentepertem ayongzüka liasü.